ភ្នំពេញ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានប្រកាសឱ្យគណបក្សនយោបាយទាំងអស់ត្រៀមចុះឈ្មោះបេក្ខជនឈរឈ្មោះបោះឆ្នោតជាក្រុមប្រឹក្សារាជធានីខេត្តក្រុងស្រុកខណ្ឌ ឱ្យបានទាន់កាលកំណត់ ចាប់ពីថ្ងៃទី២៧ខែកុម្ភៈដល់ថ្ងៃទី០៣ខែមីនាឆ្នាំ២០១៤។
ការប្រកាសរបស់ គ.ជ.ប ធ្វើឡើងក្នុងសន្និសីទជួបជាមួយតំណាងគនបក្សនយោបាយ និងអង្គការក្រៅរដ្ឋាភិបាល នៅចុងសប្តាហ៍នេះ។លោកស្រី ស៊ីន ជុំបូ អនុប្រធាន គ.ជ.ប បានមានប្រសាសន៍ថា គណបក្សនយោបាយទាំងអស់ ដែលមានបំណងចង់ចូលរួមក្នុងការបោះឆ្នោតជ្រើសរើសក្រុមប្រឹក្សានេះ ត្រូវរៀបចំបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ចាប់ពីឥឡូវនេះទៅ ហើយត្រៀមចុះបញ្ជីនេះនៅ គណៈកម្មការខេត្តរៀបចំការបោះឆ្នោត ឱ្យទាន់កាលកំណត់ ព្រោះការចុះបញ្ជីគណបក្សនយោបាយឈ្មោះមានរយៈពេល៥ថ្ងៃប៉ុណ្ណោះចាប់ពីថ្ងៃទី២៧ដល់ថ្ងៃទី០៣ខែមីនាឆ្នាំ២០១៤។
លោកស្រី បញ្ជាក់ថា បេក្ខជនឈរឈ្មោះជាក្រុមប្រឹក្សានេះ ត្រូវលាឈប់ពីតំណែងជាមន្ត្រីរាជការបច្ចុប្បន្ន ដូចសមាជិកក្រុមប្រឹក្សាឃុំ សង្កាត់ ឬជាសមាជិកគ.ជ.ប ។ចំណែកអ្នកចង់ធ្វើជាអ្នកសង្កេតការណ៍តំណាងបក្ស បានតែចំពោះសមាជិកគណបក្សនយោបាយណាដែលចូលរួមប្រកួតប្រជែងបោះឆ្នោតប៉ុណ្ណោះ។ចំពោះការចំណាយ លោក ទេព នីថា អគ្គលេខាធិការ គ.ជ.ប បានថ្លែងថា ការបោះឆ្នោតក្រុមនឹងគ.ជ.ប គ្រោងចំណាយប្រហែលជាង ១លាន៧សែន២ម៉ឺនដុល្លារអាមេរិក។
គួរបញ្ជាក់ថា សម្រាប់ការបោះឆ្នោតក្រុមប្រឹក្សារាជធានីខេត្តក្រុងស្រុកខណ្ឌអាណត្តិទី២នេះ នឹងប្រព្រឹត្តទៅនៅថ្ងៃទី១៨ខែឧសភា ឆ្នាំ២០១៤ និងមាន១៩៧ការិយាល័យ នៅទូទាំងប្រទេស។ ចំពោះដំណើរការស្រង់បញ្ជីឈ្មោះអ្នកបោះឆ្នោតត្រូវបញ្ចប់នៅថ្ងៃទី០៨ខែមិនា ៕ ដោយ៖ រតនា