ភ្នំពេញៈ សម្តេចក្រុមព្រះ នរោត្តម រណឫទ្ធិ អំពាវនាវឲ្យតំណាងរាស្រ្តជាប់ឆ្នោត នៃគណបក្សសង្គ្រោះជាតិទាំង៥៥រូប ចូលរួមប្រជុំសភាជាតិ ដើម្បីជាប្រយោជន៍ដល់ប្រជាពលរដ្ឋជាម្ចាស់ឆ្នោត។ថ្លែងទៅកាន់ក្រុមអ្នកសារព័ត៌មានកាលពីព្រឹកថ្ងៃទី១៦ មីនា ឆ្នាំ២០១៤ នៅសណ្ឋាគារឯកជនមួយខណៈពេលដែលសម្តេចក្រុមព្រះ នរោត្តម រណឫទ្ធិ ជួបជាមួយប្រជារាស្ត្រប្រមាណជាង ២០០នាក់ដែលធ្វើដំណើរមកពីតាមបណ្តាខេត្តនានា ដើម្បីថ្លែងប្រាប់ពីដំណើរនៃការយាងចូល ក្នុងឆាកនយោបាយវិញជាមួយនឹងការបង្កើតគណបក្សថ្មីមួយដែលមានឈ្មោះថា (សង្គមរាស្ត្រ រាជាធិបតេយ្យ)។
សម្តេចក្រុមព្រះ បានមានប្រសាសន៍បន្តឲ្យដឹងថា ព្រះអង្គគាំទ្រឲ្យគណបក្សប្រជាជនកម្ពុជា និងគណបក្សសង្គ្រោះជាតិ បន្តការចរចាឲ្យបានឆាប់រហ័ស ដើម្បីដោះស្រាយបញ្ហា ដែលជាប់គាំងកន្លងមក ព្រោះថារយៈពេលជាង៨ ខែមកហើយ លទ្ធផលនៅត្រឹមតែការកែទម្រង់ គ.ជ.ប នោះទេ។ សម្តេចក្រុមព្រះ បានបន្តឲ្យដឹងថា ការដោះស្រាយពិតប្រាកដគួរតែ ចូលទៅដោះស្រាយនៅក្នុងរដ្ឋសភាដែលជាវេទិកាស្របច្បាប់មិនមែនយកទៅដោះស្រាយនៅទីលានប្រជាធិបតេយ្យ នោះទេ។ជាមួយគ្នានោះដែរ សម្តេចក្រុមព្រះ បានមានប្រសាសន៍ ឲ្យដឹងទៀតថា “ខ្ញុំគាំទ្រ មហាគាំទ្រ និងបន់ឲ្យការចរចាទទួលបានជោគជ័យ។ខ្ញុំសុំឲ្យ យកបញ្ហាជាតិធំៗយកមក ដោះស្រាយ”៕
ដោយ៖ ភីន រ៉ា