ភ្នំពេញ៖ នៅរាជធានីភ្នំពេញបានចាប់ឆ្នោតកំណត់លេខរៀងគណបក្សនយោបាយ នៅលើសន្លឹកឆ្នោតរួចរាល់ហើយ កាលពីព្រឹកថ្ងៃទី១៣ ខែមីនា ឆ្នាំ២០១៤ សម្រាប់ការរៀបចំបោះឆ្នោតជ្រើសតាំង សមាជិកក្រុមប្រឹក្សា រាជធានី-ខេត្ត-ក្រុង-ស្រុ ក-ខណ្ឌ អាណត្តិទី២ នាថ្ងៃទី១៨ ខែឧសភា ឆ្នាំ២០១៤ ខាងមុខនេះ។ នៅរាជធានី ភ្នំពេញ មានតែគណបក្សពីរប៉ុណ្ណោះ ចុះឈ្មោះ និងដាក់បេក្ខជនឈរឈ្មោះបោះឆ្នោត គឺគណបក្សប្រជាជនកម្ពុជា និងគណបក្សសង្គ្រោះជាតិ។
លទ្ធផល នៃការចាប់ឆ្នោត កំណត់លេខរៀងលើសន្លឹកឆ្នោតរបស់គណបក្សនយោបាយ នៅរាជធានីភ្នំពេញ ដែលបានធ្វើឡើង នាព្រឹកថ្ងៃទី១៣ មីនានេះ នៅគណៈកម្មការរាជធានីរៀបចំការបោះឆ្នោត បង្ហាញថា៖សម្រាប់ ការបោះឆ្នោតជ្រើសតាំង សមាជិកក្រុមប្រឹក្សា រាជធានីភ្នំពេញ គឺគណបក្សប្រជាជនកម្ពុជា ស្ថិតនៅលំដាប់លេខរៀងទី១ លើសន្លឹកឆ្នោត។ ចំណែកគណបក្សសង្គ្រោះជាតិស្ថិតនៅលេខរៀងទី២។ ដោយឡែកសម្រាប់សន្លឹកឆ្នោត របស់ខណ្ឌទាំង ១២ នៅក្នុងរាជធានីភ្នំពេញ រួមមាន៖
១-ខណ្ឌចំការមន៖ គណបក្សប្រជាជនកម្ពុជា នៅលេខរៀងទី១ និងគណបក្សសង្គ្រោះជាតិ លេខរៀងទី២
២-ខណ្ឌដូនពេញ៖ គណបក្សសង្គ្រោះជាតិ លេខរៀងទី១ និងគណបក្សប្រជាជនកម្ពុជា នៅលេខរៀងទី២
៣-ខណ្ឌ៧មករា៖ គណបក្សប្រជាជនកម្ពុជា លេខរៀងទី១ និងគណបក្សសង្គ្រោះជាតិ លេខរៀងទី២
៤-ខណ្ឌទួលគោក៖ គណបក្សប្រជាជនកម្ពុជា លេខរៀងទី១ និងគណបក្សសង្គ្រោះជាតិ នៅលេខរៀងទី២
៥-ខណ្ឌដង្កោ៖ គណបក្សសង្គ្រោះជាតិ លេខរៀងទី១ និងគណបក្សប្រជាជនកម្ពុជា នៅលេខរៀងទី២
៦-ខណ្ឌមានជ័យ៖ គណបក្សប្រជាជនកម្ពុជា លេខ១ និងគណបក្សសង្គ្រោះជាតិ លេខ២
៧-ខណ្ឌឫស្សីកែវ៖ គណបក្សសង្គ្រោះជាតិ លេខរៀងទី១ និងគណបក្សសង្គ្រោះជាតិ លេខរៀងទី២
៨-ខណ្ឌសែនសុខ៖ គណបក្សប្រជាជនកម្ពុជា លេខរៀងទី១ និងគណបក្សសង្គ្រោះជាតិ លេខរៀងទី២
៩-ខណ្ឌពោធិ៍សែនជ័យ៖ គណបក្សសង្គ្រោះជាតិ លេខរៀងទី១ និងគណបក្សប្រជាជនកម្ពុជា លេខរៀងទី២
១០-ខណ្ឌច្បារអំពៅ៖ គណបក្សសង្គ្រោះជាតិ លេខរៀងទី១ និងគណបក្សប្រជាជនកម្ពុជា លេខរៀងទី២
១១-ខណ្ឌជ្រោយចង្វា៖ គណបក្សសង្គ្រោះជាតិ លេខរៀងទី១ និងគណបក្សប្រជាជនកម្ពុជា លេខរៀងទី២
១២-ខណ្ឌព្រែកព្នៅ៖ គណបក្សប្រជាជនកម្ពុជា លេខរៀងទី១ និងគណបក្សសង្គ្រោះជាតិ លេខរៀងទី២
សូមរម្លឹកថា សម្រាប់ខេត្ត និងក្រុង ស្រុកផ្សេងទៀត នឹងត្រូវរៀបចំចាប់ឆ្នោត កំណត់លំដាប់លេខរៀង លើសន្លឹកឆ្នោត សម្រាប់គណបក្សនយោបាយ ដែលបានឈរឈ្មោះ និងដាក់បេក្ខជន ចូលរួមការបោះឆ្នោតជ្រើសតាំង ក្រុមប្រឹក្សារាជធានី ខេត្ត ក្រុង ស្រុក ខណ្ឌ ទៅតាមការកំណត់រៀងៗខ្លួន។ ការចាប់ឆ្នោតកំណត់លេខរៀង លើសន្លឹកឆ្នោតនោះ នឹងធ្វើឡើង នៅគណៈកម្មការខេត្ត រៀបចំការបោះឆ្នោត តាមខេត្តនីមួយៗ។
ការបោះឆ្នោតជ្រើសតាំង សមាជិកក្រុមប្រឹក្សារាជធានីខេត្ត ក្រុង ស្រុក ខណ្ឌ អាណត្តិទី២ នឹងធ្វើឡើង តាមរយៈការបោះឆ្នោតអសកល គឺមានតែសមាជិកក្រុមប្រឹក្សាឃុំសង្កាត់ ក្នុងតំណែងប៉ុណ្ណោះ ជាអ្នកបោះឆ្នោត នាថ្ងៃទី១៨ ខែឧសភា ឆ្នាំ២០១៤។ ការបោះឆ្នោតនេះ មានគណបក្សចំនួន ៥ បានចុះឈ្មោះ និងដាក់បេក្ខជនឈរឈ្មោះ រួមមាន៖ គណបក្សប្រជាជនកម្ពុជា គណបក្សសង្គ្រោះជាតិ គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ និងគណបក្សសាធារណរដ្ឋប្រជាធិបតេយ្យ ៕ដោយៈភីនរ៉ា