ភ្នំពេញ៖ កាលពីថ្ងៃទី០១ ខែមេសា ក្រសួងមហាផ្ទៃ បានឯកភាពចំពោះសំណើរបស់ សម្តេចក្រុមព្រះ នរោត្តម រណឫទ្ធិ ដែលសុំបង្កើតគណបក្សថ្មី ដែលមានឈ្មោះថា «សង្គមរាស្ត្រ រាជាធិបតេយ្យ»ការឯកភាពនេះ បន្ទាប់ពីសម្តេចក្រុមព្រះ នរោត្តម រណឫទ្ធិ ទ្រង់បានដាក់លិខិតទៅក្រសួងមហាផ្ទៃកាលពីថ្ងៃទី១៧ ខែមីនា ដើម្បីសុំបង្កើតគណបក្សនយោបាយ ដោយបានឡាយព្រះហស្ថលេខា លើលិខិតសុំបង្កើតគណបក្សនេះ និងមានរូបទ្រង់ផ្ទាល់ និងប្រជាពលរដ្ឋ ៩៩នាក់។ ក្រសួងបានសម្រេចឯកភាពចំពោះសំណើរសុំ បង្កើតគណបក្សនយោបាយមួយនេះ បន្ទាប់ពីបានពិនិត្យចប់សព្វគ្រប់ថា មានលក្ខខណ្ឌគ្រប់គ្រាន់។ តែទោះជាយ៉ាងណា នេះគ្រាន់តែជាដំណាក់កាលទី១ប៉ុណ្ណោះ ចំណែកដំណាក់កាលទី២ គណបក្សនេះត្រូវចុះ បញ្ជីនៅក្រសួងមហាផ្ទៃដដែល ប៉ុន្តែត្រូវមានសមាជិកគាំទ្រយ៉ាងតិច ៤០០០ ទៅ ៥០០០នាក់។
បើតាមនាយកទ្ទកាល័យរបស់សម្តេចក្រុមព្រះ នរោត្តម រណឫទ្ធិ លោក អា នន្ទ បានឲ្យដឹងថា គណបក្សនេះមិនទាន់មានយុទ្ធនាការសម្រាប់ឃោសនានយោបាយ និងបញ្ចេញគោលនយោបាយរបស់ខ្លួននៅឡើយទេ។ លោកសង្ឃឹមថា សម្រាប់គណបក្សថ្មីនេះ នឹងទទួលបានការគាំទ្រច្រើនពីសំណាក់ប្រជាពលរដ្ឋ និងទទួលអាសនៈក្នុងសភាដែរ។ គួររំលឹកផងដែរថា កាលពីថ្ងៃទី ១៦ មីនា ឆ្នាំ២០១៤ កន្លងទៅ នៅសណ្ឋាគារឯកជន មួយ បានជួបជុំក្រុមសមាជិកដែលគាំទ្រខ្លួនជាលើកដំបូង បន្ទាប់ពីព្រះអង្គបានសម្រេចចិត្តវិលចូលឆាកនយោបាយវិញ តាមការរយៈនៃការបង្កើតគណបក្សថ្មីមួយ ដែលមានឈ្មោះថា «គណបក្សសង្គម រាស្ត្ររាជាធិបតេយ្យ»។ ជាមួយគ្នានោះ ព្រះអង្គម្ចាស់ នរោត្តម រណឫទ្ធិ បានមានបន្ទូលថា គណបក្សថ្មីរបស់ព្រះអង្គ គឺជាគណបក្សរាជានិយមពិតប្រាកដ ក្រោមបាវចនា «រាស្ត្រធិបតេយ្យ សាសនា រាជបល្ល័ង្ក» ។ ហើយព្រះអង្គ បានមានបន្ទូលបញ្ជាក់ថា ការបង្កើតគណបក្សថ្មីរបស់ព្រះអង្គមិនមែនដើម្បីប្រឆាំងនឹង ហ្វ៊ុនស៊ិនប៉ិច ឬគណបក្សណាមួយនោះឡើយ ប៉ុន្តែព្រះអង្គមានគោលបំណងបម្រើ និងការពាររបបរាជានិយមដែលប្រជារាស្ត្រភាគច្រើនស្រឡាញ់៕
ដោយៈ ភីនរ៉ា