ភ្នំពេញៈ គណៈកម្មការចម្រុះ គណបក្សប្រជាជនកម្ពុជា និងគណបក្សសង្គ្រោះជាតិ បានជួបប្រជុំគ្នា នៅថ្ងៃទី១៧ ខែមីនា ឆ្នាំ២០ ១៤ នៅវិមានព្រឹទ្ធសភា និងបានព្រមព្រៀង បញ្ចូលក្នុងក្របខ័ណ្ឌកំណែទម្រង់ ការបោះឆ្នោត នូវប្រធានសរុប១៤ចំណុចដូច ខាងក្រោម។
១.ការរៀបចំការ ចុះឈ្មោះអ្នកបោះឆ្នោត និងបញ្ជីឈ្មោះអ្នកបោះឆ្នោត ដើម្បីធានា សិទ្ធិបោះឆ្នោត របស់ប្រជាពលរដ្ឋគ្រប់រូប
២.រៀបចំបង្កើតច្បាប់ស្ដីពី ហិរញ្ញវត្ថុរបស់គណបក្សនយោបាយ
៣.កំណែទម្រង់ស្ថាប័នរៀបចំការបោះឆ្នោត
៤.អព្យាក្រឹត្យភាព និងសុចរិតភាព នៃអង្គការសង្គមស៊ីវិល
៥.ប្រព័ន្ធផ្សព្វផ្សាយ និងមធ្យោបាយផ្សព្វផ្សាយរបស់គណបក្សនយោបាយ
៦.យន្ដការ នៃការដោះស្រាយវិវាទ
៧.ការសង្កេតការណ៍បោះឆ្នោត
៨.អព្យាក្រឹត្យភាព នៃមន្ដ្រីរាជការ និងកម្លាំងប្រដាប់អាវុធ
៩.កាលបរិច្ឆេទ នៃការបោះឆ្នោត
១០.បទបញ្ជា និងនីតិវិធី នៃការបោះឆ្នោត
១១.កែសម្រួល និងពង្រឹងទោសប្បញ្ញត្ដិ នៅក្នុងច្បាប់បោះឆ្នោត
១២.ការឃោសនាបោះឆ្នោត
១៣.ការបោះឆ្នោតមេភូមិ
១៤.ការស្ទង់មតិ។ ក្រុមការងារគណបក្សទាំងពីរ នឹងបន្ដជួបគ្នា ជាថ្មីទៀត នៅថ្ងៃទី២៤ ខែមីនា ខាងមុខ ដើម្បីបន្ដពិភាក្សា អំពីការកែទម្រង់ការបោះឆ្នោត។
គួរកត់សម្គាល់ដែរថា កិច្ចប្រជុំគណៈកម្មការចម្រុះកំណែទម្រង់ការបោះ ឆ្នោតនៅព្រឹកថ្ងៃទី១៧ មីនានេះ គណបក្សសង្រ្គោះជាតិ បានកែសម្រួលសមាសភាពសមាជិកមួយចំនួនក្នុងនោះរួមមាន៖ លោកស្រី មួរ សុខហួរ ជំនួស លោក អេង ឆៃអ៊ាង និងលោក អ៊ូ ច័ន្ទឫទ្ធិ ជំនួស លោក យ៉ែម បុញ្ញឫទ្ធិ។
គួរបញ្ជាក់ថា ការផ្លាស់ប្តូរសមាសភាពសមាជិកគណៈកម្មការចម្រុះតំណាងគណបក្សប្រឆាំង នេះ គឺដោយសារតែលោក អេង ឆៃអ៊ាង និងលោក យ៉ែម បុញ្ញឫទ្ធិ ជាប់បំពេញ បេសកកម្មនៅក្រៅប្រទេសរយៈពេល២សប្តាហ៍។ នេះបើតាមការបង្ហោះនៅលើទំព័រហ្វេសប៊ុករបស់លោកយ៉ែម បុញ្ញឬទ្ធិ នៅថ្ងៃទី១៧ មីនានេះ៕
ដោយៈភីនរ៉ា