ភ្នំពេញ៖ អនុរដ្ឋមន្ត្រីទទួលបន្ទុកកិច្ចការអន្ដរជាតិនៃគណៈកម្មាធិការកណ្ដាលបក្សកុម្មុយនីស្តចិនលោក Chen Feng xiang បានថ្លែងនៅក្នុងជំនួបជាមួយអគ្គលេខាធិការគណបក្សហ៊ុនស៊ិនប៉ិច កាលពីរសៀលថ្ងៃទី២៤ ខែកុម្ភៈ ឆ្នាំ២០១៤ ថា ភាគីចិនចង់អោយមានការសម្របសម្រួលរវាងគណបក្សឈ្នះឆ្នោតទាំងពីរ ដើម្បីសន្ដិភាព ស្ថិរភាពសង្គម និងការអភិវឌ្ឍន៍នៅក្នុងប្រទេសកម្ពុជា។
លោកឧបនាយករដ្ឋមន្រ្តី ញឹក ប៊ុនឆៃ បានថ្លែងទៅកាន់អ្នកសារព័ត៌មានក្រោយពីជំនួបនោះថា នៅក្នុងជំនួបនោះប្រតិភូចិន ដែលដឹកនាំដោយលោក Chen Feng xiang បានលើកឡើងពីបញ្ហាពង្រឹងកិច្ចសហប្រតិបត្តិការរវាងគណបក្សហ៊ុនស៊ិនប៉ិច និងគណបក្សកុម្មុយនីស្តចិន ជាពិសេសការពង្រឹងសមាជិកនៅតាមមូលដ្ឋាន ហើយសំរាប់ឆ្នាំនេះដែរខាងបក្សកុម្មុយនីស្ដចិនបានផ្ដល់នូវម៉ូតូ និងកង់អាគុយ ដើម្បីធ្វើការងារផងដែរ។ លោកបន្តថា ក្នុងនាមគណបក្សហ៊ុនស៊ិនប៉ិច លោកក៏បានសំណូមពរអោយបង្កើនធនធានមនុស្ស គឺការទៅសិក្សារយៈពេលវែងនៅសាធារណរដ្ឋប្រជាមានិតចិនផងដែរ។
ទាក់ទងទៅនឹងបញ្ហានយោបាយនៅកម្ពុជា លោក Chen Fengxiang បានលើកឡើង ដោយគាត់ចង់អោយមានការសម្របសម្រួលរវាងគណបក្សឈ្នះឆ្នោតទាំងពីរ ពីព្រោះប្រទេសចិនលោកមានប្រើពាក្យមួយឃ្លាថា «ប្រជាធិបតេយ្យសម្របសម្រួល» ។ លោកបញ្ជាក់ថា ការប្រើពាក្យនេះ ក៍ដោយសារតែប្រទេសកម្ពុជាយើងនៅពេលក្រោយការបោះឆ្នោតតែងមានបញ្ហាដូច្នេះត្រូវតែមានការជជែកគ្នា និងសម្របសម្រួលគ្នា ដូច្នេះទើបខាងភាគីចិនបានប្រើពាក្យប្រជាធិបតេយ្យសម្របសម្រួល។
តាមលោក ញឹក ប៊ុនឆៃ បញ្ជាក់ថា គោលបំណងដែលលោក Chen Fengxiang ចង់លើកឡើង គឺលោកចង់អោយគណបក្សដែលឈ្នះឆ្នោតមានការសម្របសម្រួលឈានទៅដល់ធ្វើការជាមួយគ្នាដើម្បីសន្ដិភាព និងស្ថិរភាព និងដើម្បីសង្គម ព្រមទាំងការអភិវឌ្ឍន៍នៅក្នុងប្រទេសកម្ពុជា៕ ដោយ៖ ស.ស្អាត