ភ្នំពេញ៖ បន្ទាប់ពីប្រកាសខ្លួន ហក់ចូលក្នុងឆាកនយោបាយជាថ្មីម្តងទៀត កាលពីពេលកន្លងនេះ សម្តេចក្រុមព្រះ នរោត្តម រណឬទ្ធិ អតីតៈព្រះប្រធានគណបក្សហ៊្វុនស៊ិនប៉ិច ដែលគ្រោងនឹងក្លាយជាប្រធានគណបក្សថ្មីមួយគឺគណបក្ស សង្គមរាស្ត្រ រាជាធិបតេយ្យ នៅក្នុងពេលឆាប់ៗនេះ បានបង្ហាញពីការជួបជុំសមាជិកថ្មីរបស់ទ្រង់នៅពាក់កណ្តាលខែនេះ។
លោក ប៉ែន សង្ហារ អ្នកនាំពាក្យរបស់សម្តេចក្រុមព្រះ បានអោយដឹងនៅល្ងាចថ្ងៃម្សិលម៉ិញនេះថា សម្តេចក្រុមព្រះ នរោត្តម រណឫទ្ធិ នឹងយាងជួបជុំសំណេះសំណាលមួយជាមួយសមាជិកគាំទ្រពីគ្រប់រាជធានី-ខេត្ត នៅព្រឹកថ្ងៃទី១៦ ខែមីនា ឆ្នាំ២០១៤ នៅសណ្ឋាគារសាន់វ៉េ ដើម្បីប្រកាសពីការយាងចូលឆាកនយោបាយជាថ្មីម្តងទៀត។ប៉ុន្ទែ អ្នកនាំពាក្សរូបនេះ មិនបានបង្ហើប ទេ ថា នឹងមានសមាជិកប៉ុន្មានាក់ចូលរួមក្នុងពិធីនោះទេ ព្រោះនេះជាការជួបជុំលើកដំបូង បន្ទាប់ពីសាកល្បង ហក់ចូលប្រឡូកក្នុង ឆាកនយោបាយជាថ្មីម្តងទៀត ក្រោយការយាងចូលទិវង្គតរបស់ ព្រះបរមរតនកោដ្ឋ មកនោះ។
មានក្រុមអ្នកវិភាគនយោបាយមួយចំនួន បាននិយាយបែបពេបជ្រាយថា ហួសពេលដែល សម្តេចក្រុមព្រះ នរោត្តម រណឬទ្ធិ វិលចូលនយោបាយជាថ្មីនោះហើយ ព្រោះថាប្រជាប្រិយ៍ភាពរបស់ទ្រង់មានតិចតួចបំផុតសម្រាប់ប្រជាជនកម្ពុជា ពិសេស អ្នក យកជីវិតទៅប្តូរដើរតាម ទ្រង់ក្នុងរយៈពេលកន្លងមក ម៉្យាងទៀតដោយសារតែទ្រង់ផ្ទាល់ធ្លាប់ធ្វើឲ្យរាស្រ្តខ្មែរខកចិត្តនឹងរឿង ឥតបានការជាច្រើនលើក ។
ក្រុមអ្នកវិភាគទាំងនោះ និយាយទៀតថា បើទ្រង់ រណឬទ្ធិ ចង់ប្រឡូកក្នុងឆាកនយោបាយជាថ្មី មែននោះ គម្បីទ្រង់ ហក់ចូល ទៅតាមច្រកគណបក្សដែលទ្រង់ធ្លាប់ដឹកនាំទៅវិញ ក្រែងមានសំណាងបានម៉ាតុ ឬ ម៉ាកៅអី នឹងគេ ព្រោះនៅមានសមាជិក សមាជិការស្រាប់ខ្លះ មានទីស្នាក់ការ តាមរាជធានីខេត្ត និយាយរួមគឺនៅមានរចនាសម្ព័ន្ធមូលដ្នាននៅសេសសល់ខ្លះដែលអាចឲ្យទ្រង់ប្រមែប្រមូលសមាជិកបានខ្លះៗ ងាយស្រួលជាង។ បើរំពឹងទៅលើប្រជាប្រិយ៍ភាព របស់ព្រះអង្គ មកបង្កើតគណបក្ស បក្សថ្មីនោះទៅមិនរួចទេ ទោះជាដាក់ឈ្មោះច្រឡំទៅនិង សង្គមរាស្រ្តនិយម ដែលមានឈ្មោះបោះសំលេងល្បីល្បាញ ក្នុង អតីតកាលក៏ដោយក៏មិនអាចទៅរួចដែរ គឺបានត្រឹមតែកើត ហើយក៏លិចបាត់ទៅវិញបន្ទាប់ពីបោះឆ្នោតរួចតែប៉ុណ្ណោះ។
បើទោះជាមានក្រុមអ្នកវិភាគនយោបាយមួយចំនួនអះអាងបែបនេះក្តី ក៏មន្រ្តីដែលស្និតនិង សម្តេចក្រុមព្រះ នរោត្តម រណឬទ្ធិ លោក អានន្ន ដាយ៉ាត ធ្លាប់បានលើកឡើងថា មានសមាជិកសមាជិកការ គណបក្សហ៊្វុនស៊ិនប៉ិច មួយចំនួនបានត្រៀមខ្លួន រួចជាស្រេច ក្នុងការចូលរួមជាមួយគណបក្សថ្មី ដែលដឹកនាំដោយសម្តេចក្រុមព្រះនៅពេលខាងមុខនេះដែរ។
សូមរំលឹកថា សម្តេចក្រុមព្រះ នរោត្តម រណឬទ្ធិ ធ្លាប់បានអះអាងនៅពេលថ្មីៗនេះថា ហេតុផលដែលធ្វើឲ្យទ្រង់ សម្រេច ព្រះ ទ័យ ជាថ្មីម្តងទៀតនេះគឺមកពីបញ្ហានយោបាយ នៅកម្ពុជា ពិសេសក្រោយការបោះឆ្នោត កាលពីខែកក្កដា ដែលគណបក្សជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ មិនបានដោះស្រាយ។ ហើយគណបក្សដែលបង្កើតថ្មីនេះ គឺស្ថិតនៅកណ្តាល មិនប្រឆាំង ហើយក៏មិនគាំទ្ររដ្ឋាភិបាលរបស់គណបក្សប្រជាជនកម្ពុជាដែរ ៕ ដោយ៖ សស្អាត