ភ្នំពេញ៖ អង្គការ UNESCO បានធ្វើការវាយតម្លៃថា កម្ពុជាបានចំណាយថវិកា ប្រហែលជាង៣០០លានដុល្លារអាម៉េរិកក្នុងមួយឆ្នាំៗទៅលើការពង្រឹងគុណភាពវិស័យអប់រំ។លោកស្រី Anne Lemaistre តំណាង អង្គការ UNESCO ប្រចាំនៅកម្ពុជា មានប្រសាសន៍ថា ថវិកាដ៏ច្រើនសន្ធឹកសន្ធាប់នេះ គឺបានចំណាយទៅលើការពង្រឹងគុណភាពគ្រូបង្រៀន និងការ បង្រៀនឲ្យកាន់តែមានប្រសិទ្ធ្ភាពដល់សិស្ស។ បញ្ហាអប់រំនៅកម្ពុជា គឺខ្វះគ្រូបង្រៀនទាំងបរិមាណ និងគុណភាពដែលធ្វើឲ្យប៉ះពាល់ដល់គុណភាពអប់រំយ៉ាងខ្លាំង។
លោកស្រីបានថ្លែងទៀតថា ពិភពលោកកំពុងតែប្រឈមនឹងបញ្ហានៃការអប់រំដោយវិបត្តិនេះ បានធ្វើរដ្ឋាភិបាលជាសកល ត្រូវចំណាយទឹកប្រាក់រហូត១២៩ពាន់លាន ដុល្លារអាម៉េរិក ក្នុងមួយឆ្នាំៗដើម្បីទប់ស្កាត់ បញ្ហាប្រឈមនេះ។
លោកស្រី Anne បញ្ជាក់ ថា សម្រាប់ប្រទេសកម្ពុជា ដើម្បីឲ្យគុណភាពអប់រំនៅទូទាំងសកលលោក សម្រាប់ ទាំងអស់គ្នា ទទួលបានផ្លែផ្ការីកចម្រើន គឺត្រូវមានយុទ្ធសាស្ត្រសំខាន់ៗដូចជា៖ ការផ្តោតសំខាន់ទៅលើគុណភាពគ្រូបង្រៀន,ការលើកទឹកចិត្ត និងពង្រឹងគុណភាពគ្រូបង្រៀន ធ្វើឲ្យប្រព័ន្ធអប់រំអាចដំណើរការ បានយ៉ាងរលូន និងមានប្រសិទ្ធភាព។
លោកស្រីបានស្នើឲ្យក្រសួងអប់រំ យុវជន និងកីឡា អនុវត្តគោលការណ៍អភិវឌ្ឍន៍ សមត្ថភាពគ្រូបង្រៀន ព្រមទាំងរៀបចំ វិន័យ និងឯកសារច្បាប់បន្ថែមទៀតដើម្បីពង្រឹងសមត្ថភាពគ្រូបង្រៀនឲ្យកាន់តែ រឹងមាំ។
យោងតាមរបាយការណ៍ស្រាវជ្រាវរបស់អង្គការភាពជាដៃគូអប់រំនៃអង្គការក្រៅរដ្ឋាភិបាល បាន រកឃើញថា ប្រាក់ខែគឺជាសារៈសំខាន់ដល់ការទាក់ទាញ និងរក្សាគ្រូបង្រៀនដែលមានគុណភាពខ្ពស់។ ពោលគឺក្នុងចំណោមដែល បានឆ្លើយ៨៦ភាគរយបាននិយាយថា ប្រាក់ ឈ្នួលមូលដ្ឋានសមរម្យ គឺគួរតែច្រើនជាងពី៩០ដុល្លារអាម៉េរិកក្នុងមួយខែឡើងទៅ។ ចំណែកចំនួន៥២ភាគរយបាននិយាយថា គ្រូបង្រៀនគួរតែទទួលបានប្រាក់បៀវត្សរ៍ច្រើនជាង១២០ដុល្លារអាម៉េរិកក្នុងមួយខែ។ របាយការណ៍ដដែលក៏បានរកឃើញទៀតថាកុមារគ្រប់រូបត្រូវការគ្រូបង្រៀនល្អ ។
លោក អ៊ឹម កុច រដ្ឋលេខាធិការក្រសួង អប់រំ យុវជន និងកីឡាមានប្រសាសន៍ថា បើទោះបីជាមានកង្វះខាតយ៉ាងណាក្តីប៉ុន្តែ រាជរដ្ឋាភិបាលកម្ពុជាកំពុងធ្វើកំណែទម្រង់ ស៊ីជម្រៅដោយក្នុងនោះបាននឹងកំពុងបង្កើននូវគុណភាពអប់រំមានការលើកទឹកចិត្តគ្រូបង្រៀនដោយដំឡើងនូវប្រាក់បៀវត្សរ៍។ជាពិសេសយុទ្ធសាស្ត្របង្កើនគ្រូបង្រៀនឲ្យបានគ្រប់គ្រាន់ទៅតំបន់ដាច់ស្រយាលដែលកំពុងខ្វះគ្រូបង្រៀន។ លោកបានទទួលស្គាល់ថា កង្វះការយកចិត្តទុកដាក់លើគុណភាពនៃការអប់រំ និងការខកខានមិនបានផ្តល់សេវាដល់កុមារដែលបាត់បង់ឱកាសរៀនសូត្រនោះគឺបានធ្វើឲ្យមានវិបត្តិ នៃការរៀនសូត្រ។
របាយការណ៍របស់ក្រសួងអប់រំ យុវជន និងកីឡាបានឲ្យដឹងថា គិតត្រឹមដំណាច់ ឆ្នាំ២០១២ នៅទូទាំងប្រទេសកម្ពុជាមានថ្នាលបណ្ដុះចំណេះដឹងទូទៅចំនួន១១.៣៧០ សាលាក្នុងនោះសាលាមត្តេយ្យសិក្សា មានចំនួន២,៨១៣ សាលាបឋមសិក្សា ចំនួន ៦.៩១០ អនុវិទ្យាល័យចំនួន ១.២១៤ និងវិទ្យាល័យចំនួន៤៣៣។
ដោយឡែកសម្រាប់បុគ្គលិកអប់រំនៅទូទាំងប្រទេសវិញ គឺមាន១១១.២៦១នាក់ ក្នុងនោះស្រី៤៥.១៤៩នាក់ស្មើនឹង៤១ភាគរយ។ ជាមួយគ្នានេះគ្រឹះស្ថានឧត្ដមសិក្សាមាន១០១ក្នុងនោះ គ្រឹះស្ថានឧត្ដមសិក្សារដ្ឋមាន៣៩និងឯកជនមាន៦២ដែលមានទីតាំងស្ថិតនៅតាមរាជធានីខេត្តទាំង១៩។ និស្សិតចាប់ពីថ្នាក់បរិញ្ញាបត្ររងដល់បណ្ឌិតមានចំនួន២៥៥.៧៩១នាក់ ក្នុងនោះនារីមានចំនួន៣៨ភាគរយ៕ ដោយ៖ ភីន រ៉ា