ភ្នំពេញៈ លោកអូហ្សា សូយឈិ នាយកប្រតិបត្តិរបស់ក្រុមហ៊ុនអ៊ី អន ម៉លខូអិលធីឌី បានលើកឡើង កាលពីថ្ងៃទី២០ ខែធ្នូ ឆ្នាំ២០១២ នៅសង្កាត់ទន្លេបាសាក់ថា ទោះបីជាស្ថានភាពនយោបាយនាពេលបច្ចុប្បន្ននេះនៅមិនទាន់មានស្ថិរភាពល្អប្រសើរយ៉ាងណាក៏ ក៏លោកគ្មានមានការព្រួយបារម្ភទៅលើការវិនិយោគនោះឡើយ ដោយសារតែលោកមានជំនឿជឿជាក់លើរាជរដ្ឋាភិបាលកម្ពុជា។ តំណាងម្ចាស់វិនិយោគរូបបានបន្តថា ការដែលលោកសម្រេចចិត្តកសាងផ្សារទំនើបនៅប្រទេស កម្ពុជាដោយសារតែកម្ពុជាប្រទេសមានសុខសន្តិភាពពេញលេញ ហើយមានអំណោយផល និងសក្ដានុពលលើផ្នែកវិនិយោគពិសេសនាពេលបច្ចុប្បន្ននេះនៅមិនទាន់ មានផ្សារទំនើបមានលក្ខណៈជាស្តង់ដារអន្តរជាតិនៅឡើយទេ។ ដូចនេះលោកចង់ផ្តល់នូវសេវាទំនិញល្អមានគុណភាពដល់ប្រជាពលរដ្ឋ កម្ពុជានឹងធ្វើឲ្យប្រជាពលរដ្ឋមានជីវភាពកាន់តែល្អប្រសើរ។
លោកក៏បានរំពឹងទុកជាមុនដែរថា ប្រជាពលរដ្ឋកម្ពុជានឹងរីករាយនឹងទិញទំនិញមានគុណភាពបែប ជប៉ុននិងតម្លៃថោកសមរម្យពីផ្សារទំនើបអ៊ីអនម៉លភ្នំពេញ។ ផ្សារទំនើបនេះនឹងប្រើប្រាស់កម្លាំងពលកម្មចំនួនពី២៥០០ទៅ៣០០០នាក់ ដែលស្ទើរ១០០%ជាជនជាតិខ្មែរ។ គួររំម្លឹកថា ផ្សារទំនើបអ៊ី អនម៉លភ្នំពេញបានចាប់ផ្តើមសាងសង់កាលពីថ្ងៃទី២០ ខែធ្នូ ឆ្នាំ២០១២ ក្រោមអធិបតីភាព របស់សម្ដេចតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ហើយគ្រោងនឹងបើកសម្ពោធជាផ្លូវការនៅខែមិថុនា ឆ្នាំ២០១៤ខាងមុខនេះ។
ពាក់ព័ន្ធនឹងការសាងសង់ផ្សារទំនើបខាងលើនេះ កន្លងមកក្រុមហ៊ុន និងប្រទេសកម្ពុជាធ្លាប់បានផ្សារភ្ជាប់នូវទំនាក់ទំនងយ៉ាងល្អនឹងគ្នាតាមរយៈសកម្មភាពនានាមួយចំនួនដូចជាក្លឹបអ៊ី អន១%បាន ឧបត្ថម្ភដល់ការសាងសង់សាលារៀនការដាំដើមកូនឈើដែលជាប្រភេទដើមក្រវាញ និងដើមម៉ៃសាក់ចំនួន៦៦០០ដើមនៅជុំវិញ បរិវេណប្រាសាទអង្ករវត្តក្នុងទំហំដី៣ហិកតា ឆ្នាំ២០០២និង ឆ្នាំ២០០៤និងដាំកូនឈើដើម្បីការពារភ្លៀងនិងខ្យល់បោកបក់ទៅលើ ប្រាសាទចៅស្រីវិបុល៕
ដោយ៖ ភីនរ៉ា