ភ្នំពេញ៖ សិស្ស-និស្សិតកម្ពុជាប្រមាណជាង៨៦,២០០នាក់មកពីទូទាំងប្រទេសគ្រោងប្រកួតប្រជែងសមត្ថភាពលើជំនាញ បច្ចេកទេសកុំព្យូទ័រ Microsoft Office Specialist ដើម្បីជ្រើសរើសយកជើងឯកឆ្នើមសម្រាប់ប្រទេសកម្ពុជា ក្នុងការប្រកួតប្រជែងជាលក្ខណៈអន្តរជាតិ បន្តជាមួយបណ្តារប្រទេសចំនួន១០២ទៀត នៅសហរដ្ឋអាមេរិក នាថ្ងៃទី២៧ដល់ថ្ងៃទី៣០ខែកក្កដាឆ្នាំ២០១៤ ។
នេះជាកម្មវិធីប្រលងប្រកួតប្រជែងពាន់រង្វាន់ពិភពលោកប្រចាំឆ្នាំ២០១៤ លើជំនាញបច្ចេកទេសកំព្យូទ័រ Microsoft Office Specialist (MOS) ដោយផ្តោតទៅលើយុវជន ក្នុង ជំនាញ Word 2010 , Excel 2010 និង PowerPoint 2010 ដែលជាកម្មវិធីលើកដំបូងក្នុង ប្រទេសកម្ពុជា ក្រោមកិច្ចសហការគ្នារវាង ក្រសួងអប់រំយុវជន និងកីឡា និងក្រុមហ៊ុន IIG Education Cambodia ក្នុងគោលដៅផ្តល់ឱកាសដល់ សិស្សនិស្សិតកម្ពុជាបានបញ្ចេញសមត្ថភាពរបស់ខ្លួននៅលើឆាកអន្តរជាតិ។
លោក ស្រី ឡាយ គន្ធា អគ្គនាយកគ្រប់គ្រង ក្រុមហ៊ុន IIG Education Cambodia បានមានប្រសាសន៍ឲ្យដឹង នៅក្នុងពិធីបើកវគ្គប្រលងប្រគួតប្រជែងពានរង្វាន់ពិភពលោកប្រចាំឆ្នាំ២០១៤ នាព្រឹកថ្ងៃទី១៨ខែកុម្ភៈនេះថា ដើម្បីបង្កើតភាពប្រគួតប្រជែងតាមបែបបញ្ញាសំរាប់ក្មេងៗ សិស្ស និស្សិត ដែលមានអាយុពី១៣ទៅ២២ឆ្នាំ នៅជុំវិញពិភពលោកធ្វើការប្រគួតប្រជែង ដោយបញ្ចេញជំនាញរបស់ពួកគេ នៅលើការប្រើប្រាស់កម្មវិធី Microsoft Office ។
ដោយឡែកសម្រាប់កម្ពុជា នេះជាលើកដំបូងហើយ ដែលយើងបង្កើតឲ្យមានកម្មវិធីនេះ ហើយមានការចូលរួមពីបណ្តារស្ថាប័នចំនួន២២ មានសិស្ស និស្សិតប្រមាណជា៨៦,២០០នាក់នៅទូទាំងប្រទេសបានចូលរួម។ ក្នុងនោះស្ថាប័ននីមួយៗមានឱកាសជ្រើសរើសសិស្សនិស្សិត ឆ្នើមចំនួន១៥រូប ធ្វើការប្រគួតប្រជែងទៅកាន់វគ្គផ្តាច់ព្រាត់ ដើម្បីទទួលបានអ្នកឆ្នើមប្រចាំប្រទេសចំនួន៣រូប មាន Words ១រូប Excel ១រូប និង PowerPoint ១រូប ទៅចូលរួមប្រលងប្រគួតខ្នាតអន្តរជាតិ នៅរដ្ឋកាលីហ្វូញ្ញ៉ា សហរដ្ឋអាមេរិក ។
លោកស្រីបន្តថា ការប្រកួតប្រជែងស្នាដៃយុវជនខ្មែរឲ្យយល់ដឹងពីកម្មវិធី Microsoft Office ជាលក្ខណៈសាកលភាវូបនីយកម្មនេះ ដើម្បីនាំយកស្នាដៃរបស់ពួកគេទៅប្រកួតប្រជែងបង្ហាះឲ្យឃើញថា កូនខ្មែរពុំមែនអន់ជាងយុវជនបរទេសប៉ុន្មានទេ គ្រាន់តែទាន់ពុំមានឱកាសប៉ុណ្ណោះ។ ក្រៅពីការប្រកួតប្រជែងនេះពួកគេនឹងទទួលបានចំណេះដឹងជាច្រើន ដើម្បីពង្រឹងសមត្ថភាព គុណភាព ក្នុងការឆ្លើយតបទៅនឹងតម្រូវការទីផ្សារការងារក្នុង ប្រទេស កម្ពុជានិងតំបន់អាស៊ាន ដែលត្រៀមខ្លួនធ្វើសមាហរណកម្មនៅឆ្នាំ២០១៥ខាងមុខ។
លោក អ៊ឹម កុច រដ្ឋលេខាធិការក្រសួងអប់រំយុវជន និងកីឡាមានប្រសាសន៍ថា នេះមោទនភាពណាស់ សម្រាប់កូនខ្មែរ ដែលបានបង្ហាញសមត្ថភាពរបស់ខ្លួនជាមួយនឹងក្រុមយុវជនមកពីប្រទេសជាច្រើននៅលើពិភពលោក ដើម្បីដណ្តើមជ័យលាភី ជូនប្រទេសជាតិ ។ ម៉្យាងទៀត នេះជាសម័យកុំព្យូទ័រ រាល់ការទំនាក់ទំនងគ្នា ក្នុងប្រទេស តំបន់ និងពិភពលោក គឺចាំបាច់ត្រូវការប្រើប្រាស់កុំព្យូទ័រ ទាមទារឲ្យយុវជនកម្ពុជាទាំងអស់ ត្រូវតែចេះប្រើប្រាស់ស្ទាត់ជំនាញលើផ្នែកនេះ និងភាសារអង់គ្លេស។
និស្សិតមកពីសាកលវិទ្យាល័យកម្ពុជា អ៊ឹម ចាន់រក្សា បានបញ្ជាក់ថា នេះជាកម្មវិធីដ៏ល្អបំផុត សម្រាប់យុវជនកម្ពុជាបានបង្ហាញសមត្ថភាពរបស់ខ្លួន និងជាការទន្ទឹងរងចាំជាយូរមកហើយរបស់យុវជនកម្ពុជា ដែលធ្លាប់តែលឺគេនិយាយ មិនបានចូលរួម ដូចពេលនេះទេ នឹងបានផ្តល់អត្ថប្រយោជន៍ជាច្រើន ក្នុងការពង្រឹងសមត្ថភាពនិងជំនាញរបស់ខ្ញុំទៅតាមតម្រូវការចង់បានជាលក្ខណៈអន្តរជាតិ។
តាមកម្មវិធី ប្រលងប្រគួតលក្ខណៈជាតិនៅក្នុងប្រទេសនឹងត្រូវអនុវត្តឡើងជា២ដំណាក់ ដោយទី១ប្រលងយកជើងខ្លាំងចំនួន៣៣០នាក់ ក្នុងចំនោមអ្នកចូលរួមជាង៨៦២០០នាក់ មកពីគ្រឹះស្ថានអប់រំទំាង២២នៅទូទាំងប្រទេស។ បន្ទាប់មកនឹងធ្វើការប្រកួតថ្នាក់ជាតិជ្រើសរើសយកសិស្ស និស្សិតឆ្នើមចំនួន៣រូប លើមុខជំនាញ Word 2010 ១រូប Excel 2010 ១រូប និង PowerPoint 201០ ១រូប ដើម្បីទៅប្រកួតវគ្គផ្តាច់ព្រ័តកម្រិត អន្តរជាតិ Disneyland California America ដែលនឹងប្រព្រឹត្តឡើងចាប់ពីថ្ងៃទី២៧ ដល់ថ្ងៃទី៣០ ខែកក្កដា ឆ្នាំ២០១៤ ។
សូមបញ្ជាក់ថា កម្មវិធីប្រកួតប្រជែងពានរង្វាន់ពិភពលោកប្រចាំឆ្នាំ២០១៤ នៅជំនាញកំព្យូទ័រនេះ ត្រូវបានបង្កើតឡើងតាំងពីឆ្នាំ២០០២ មកដោយ CERTRIPORT ដើម្បីបង្កើតភាពប្រកួតប្រជែងតាម បែបបញ្ញាសម្រាប់ក្មេងៗសិស្សនិស្សិតដែលមាន អាយុចាប់ពី១៣ឆ្នាំ២២ឆ្នាំនៅជុំវិញពិភពលោក។ សម្រាប់កម្ពុជានៅថ្ងៃទី១៥ ខែមិនា ២០១៤ នឹងបិទការចុះឈ្មោះ ហើយពីថ្ងៃទី១ដល់១៥ មេសា ជាវគ្គប្រគួតជុំទី១នៅតាមស្ថាប័នដែលបានចូលរួម ថ្ងៃទី២៦ មេសា វគ្គប្រគួតថ្នាក់ជាតិ ២៨ មេសា ពិធីប្រគល់រង្វាន់សំរាប់វគ្គផ្តាច់ព្រាត់ និង ថ្ងៃទី២៧-៣០កក្កដា២០១៤ ការប្រកួតពិភពលោកវគ្គចុងក្រោយនៅអាមេរិក៕
ដោយ៖ ស ស្អាត