ភ្នំពេញ ៖ ជំងឺហេម៉ូហ្វីលា (Eemophilia) ដែលគេស្គាល់ជាភាសារថាជាជំងឺឈាមក្រកកឬជំងឺឈាមរាវ គឺជាជំងឺម៉្យាងដែលអាចបណ្តាលឱ្យហូរឈាមធ្វើឲ្យមនុស្សធ្លាក់ក្នុងពិការភាពឬបាត់បង់ជីវិត។ ដោយសារប្រភេទជំងឺនេះគេកម្រនឹងបានជួបប្រទះនោះ ទើបមនុស្សភាគច្រើនមិនសូវចាប់អារម្មណ៍ ប៉ុន្តែជំងឺប្រភេទនេះអាចនឹងកើតមានទៅលើមនុស្សគ្រប់វ័យ និងជាប្រភេទជំងឺដំណរពូជ។ ដូច្នេះ ហើយបានជាសមាគមហេម៉ូហ្វីលាកម្ពុជា សហការជាមួយមូលនិធិហេម៉ូហ្វីលាញ៉ូហ្សេឡែនផ្តើមគំនិតបង្ហាញជាលើកដំបូងអំពីការព្យាបាលដោយចលនាទៅលើអ្នកជំងឺ និងគ្រួសារអ្នកកើតជំងឺហេម៉ូហ្វីលា អំពីការបង្ការ ការពារ ដោយចលនា កាលពីព្រឹកថ្ងៃទី៣១សីហាឆ្នាំ២០១៣នៅសណ្ឋាគារកាំបូឌីយ៉ាណា ដោយមានការចូលរួមពីអ្នកជំងឺ និងគ្រួសារជាង៥០នាក់។
លោក គង់ ស៊ីថាន ប្រធានសមាគមជំងឺហេម៉ូហ្វីលាកម្ពុជាបានលើកឡើងថា អ្នកជំងឺដែលមានជំងឺហេម៉ូហ្វីលានេះ គឺមិនមានការហូរឈាមលឿនជាងមនុស្សធម្មតានោះទេ ប៉ុន្តែការហូរឈាមនេះ មានរយៈពេលយូរជាងមនុស្សធម្មតា ដោយសារតែឈាមរបស់អ្នកជំងឺមិនមានសារធាតុ កត្តាឈាមកក (Clotting Factor)គ្រប់គ្រាន់ ឬ ប្រូតេអ៊ីនម៉្យាងនៅក្នុងឈាមដែលអាចត្រួតពិនិត្យទៅលើការហូរឈាម។ ដែលគេចាត់ទុកថាជាប្រភេទជំងឺមួយដ៏កម្រក្នុងចំណោមមនុស្ស១០,០០០នាក់ មានម្នាក់ ដែលកើតមកមានជំងឺហេម៉ូហ្វីលា នេះបើយោងទៅតាមស្ថិតរបស់ពិភពលោក។ ដោយឡែកនៅកម្ពុជា មានអ្នកជំងឺប្រភេទនេះប្រហែលជា៥០០០នាក់។
លោក គង់ ស៊ីថាន បន្តថា ជំងឺហេម៉ូហ្វីលា (ជំងឺឈាមរាវ)នេះចែកចេញជា៣ប្រភេទ គឺទី១កម្រិតស្រាល (A) មនុស្សអាចរស់ដោយមិនចំាបាច់ពឹងផ្អែកទៅថ្នាំពេទ្យអ្វីទាំងអស់ តែមិនអាចធ្វើការធ្ងន់បានទេ (លេងកីឡា ហក់លោត លីសែង)វាអាចនឹងងាយធ្វើឱ្យយើងហើមជាំទៅលើសារពាង្គកាយឬអាចបង្ករឲ្យមានការហូរឈាមនៅតាមសន្លាប់ ទី២ កម្រិតមធ្យម Bនិងទី៣កម្រិតធ្ងន់ (កត្តាកង្វះឈាម) មិនអាចធ្វើការងារបានអ្វីទាំងអស់ ។ ជំងឺប្រភេទអាចកើតមានឡើងតាមរយៈកត្តាតំណពូជ និងជាជំងឺម៉្យាងដែលអាចកើតឡើងដោយឯងៗទៅលើមនុស្សគ្រប់វ័យ។
.JPG)
លោកបន្តទៀតថា មូលហេតុដែលកើតជំងឺនេះ គឺនៅពេលមនុស្សម្នាក់បានកើតចេញពីផ្ទៃពោះម្តាយមកការវិឌ្ឍរបស់មនុស្សនោះ ដោយមានការខ្វះប្រូតេអ៊ីនម៉្យាង ដែលបង្កឱ្យមានឈាមកក ដូច្នេះទើបវាឈានទៅដល់ការវិឌ្ឍមួយជំហានទៀតទៅជាជំងឺហេម៉ូហ្វីលា (Eemophilia)។ នៅឯប្រទេសជឿនលឿនវិញ គេព្យាបាលចលនាជំងឺប្រភេទនេះ ដោយការចាក់ថ្នាំម៉្យាងដ៏កម្រដែលក្នុង១សប្តាហ៍ចាក់២ដងក្នុងតម្លៃថ្លៃបំផុត នៅពិភពលោកដែលមិនធ្លាប់មានពីមុន ហើយការចាក់ថ្នាំគេអាស្រ័យទៅលើទម្ងង់របស់មនុស្សនោះទៀត។
លោក គង់ ស៊ីថាន បានអំពាវនាវដល់ប្រជាពលរដ្ឋដែលសង្ស័យថា ខ្លួនកើតជំងឺខាងលើនេះ សុំ ទៅពិនិត្យធ្វើតេស្តឈាមនៅតាមមន្ទីរពិសោធន៍ចំនួន៣ គឺ ទី១ មន្ទីរពេទ្យកុមារជាតិ (រាជធានីភ្នំពេញ) ទី២ មន្ទីរពេទ្យកុមារអង្គរ (ខេត្តសៀមរាប) និងទី៣ មន្ទីរពិសោធន៍NIPHដើម្បីធ្វើការពិនិត្យរកនូវជំងឺដ៏កម្រមួយនេះ និងសិក្សាស្វែងយល់ឱ្យច្បាស់សំដៅបង្ការ ទប់ស្កាត់ និងការពារចៀសវាងកើតមានដល់ក្រុមគ្រួសារ សាច់ញ្ញាតិ និងប្រជាពលរដ្ឋទូទៅដោយយថាហេតុ។
.JPG)
នៅក្នុងសិក្ខាសាលាស្តីពីការព្យាបាលដោយចលនាអ្នកជំងឺហេម៉ូហ្វីលា លោក អ៊ុង សម្បត្តិ អគ្គលេខាធិការរងក្រុមប្រឹក្សាសកម្មភាពជនពិការ បានថ្លែងថា សិក្ខាសាលានេះ គឺមានគោល បំណងសំខាន់ៗ រួមមាន៖ ការលើកកម្ពស់ការយល់ដឹងអំពីជំងឺហេម៉ូហ្វីលា និងជំងឺវិបត្តិឈាមកកផ្សេងៗទៀតក្នុងប្រទេសកម្ពុជាយើង ក្នុងចំណោមបុគ្គលិកសុខាភិបាលមន្ត្រីធ្វើគោលនយោបាយ សុខភាព ជាសាធារណៈជនទូទៅ។ ការស្វែងរកការព្យាបាលដែលមានតម្លៃថោកសមរម្យ សម្រាប់អ្នក ជំងឺ ដោយធ្វើការបញ្ចុះបញ្ចូល និងសុំជំនួយឧបត្ថម្ភពីក្រសួងសុខាភិបាល ក្រុមហ៊ុន និងអង្គការជាតិ អន្តរជាតិនានា។ និងផ្តល់ជាព័ត៌មានការអប់រំបណ្តុះបណ្តាលការជួយឧបត្ថម្ភ និងការទំនាក់ទំនងសង្គមសម្រាប់អ្នកជំងឺហេម៉ូហ្វីលា និងអ្នកជំងឺវិបត្តិឈាមហូរផ្សេងៗទៀត និងក្រុមគ្រួសាររបស់ពួកគេ។
លោកអគ្គលេខាធិការរងរូបនេះ បានផ្តល់អនុសាសន៏មួយចំនួនដល់ក្រុមគ្រួសារអ្នកជំងឺហេម៉ូហ្វីលា និងកុមារដែលបានកើតជំងឺនេះ គឺត្រូវខិតខំប្រឹងប្រែងសិក្សា ឬ ប្រកបរបរទទួលទានដោយមិនផ្តេកផ្តួលទៅតាមជងឺឬពិការភាពរបស់ខ្លួន និងមិនត្រូវធ្វេសប្រហែលក្នុងការពារខ្លួន ពីការប៉ះទង្គិចនានា កម្រិតធ្ងន់ធ្ងរ ដែលបណ្តាលឱ្យមានឈាមហូរក្នុងសរសៃរឈាម ឬ ហូរឈាមមកក្រៅដែលជាមូលហេតុនាំឱ្យបង់ខាតថវិកា ពេលវេលា និងកម្លាំងកាយចិត្ត ពិសេសត្រូវចេះស្រឡាញ់រាប់អាន និងជួយស្វែងរកដំណោះស្រាយជាមួយគ្នាទៅវិញទៅមកដោយគ្មានការរើសអើង។
ជាមួយគ្នានោះ លោកបានសម្តែងនូវការគាំទ្រយ៉ាងពេញទំហឹង ចំពោះសកម្មភាពទាំងឡាយបាននិង កំពុងអនុវត្ត ដោយសមាគមអ្នកជំងឺហេម៉ូហ្វីលាកម្ពុជា សំដៅដោះស្រាយតម្រូវការចាំបាច់ជាមូលដ្ឋានរបស់ជនពិការដែលមានចែងក្នុងរដ្ឋធម្មនុញ្ញ ច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ដើម្បីជនពិការគ្រប់សញ្ជាតិ គ្រប់ពណ៌សម្បុរ ដែលកំពុងរស់នៅលើទឹកនៃព្រះរាជាណាចក្រកម្ពុជា។
សូមបញ្ជាក់ថា ជំងឺហេម៉ូហ្វីលានេះពុំសូវមានគ្រូពេទ្យឯកទេស និងជំនាញព្យាបាលច្រើននោះទេ នៅក្នុងប្រទេសកម្ពុជា គឺមានតែ២រូបប៉ុណ្ណោះទី១គឺលោកវេជ្ជបណ្ឌិត ជៀន សុផល នៅមន្ទីរពេទ្យកុមារជាតិ និងលោក វេជ្ជបណ្ឌិត ស៊ិន ហេង នៅមន្ទីរពេទ្យខេត្តសៀមរាប៕
ដោយ ៖ សស្អាត