ភ្នំពេញ៖ គណបក្សហ៊្វុនស៊ិនប៉ិច បានរៀបចំប្រារពព្រះរាជពិធីបុណ្យរម្លឹកខួបគម្រប់១ឆ្នាំនៃការយាងចូលទិវង្គត់ គោរពថ្វាយព្រះវិញ្ញាណក្ខន្ធ ព្រះករុណាព្រះបាទសម្តេចព្រះ នរោត្តម សីហនុ ព្រះមហាវិរក្សត្រ ព្រះវររាជបិតាឯករាជ្យ បូរណ ភាពទឹកដី និងឯកភាពជាតិខ្មែរ (ព្រះបរមរតនកោដ្ឋ) ។ព្រះរាជពិធីនេះបានប្រារពធ្វើឡើងកាលពីល្ងាចថ្ងៃទី១៤ ខែតុលា ឆ្នាំ២០១៣ ក្រោមព្រះរាជវត្តមាន សម្តេចព្រះអភិសិរីសុគន្ធាមហាសង្ឃរាជាធិបតី ប៊ូ គ្រី សម្តេចព្រះមហាសង្ឃរាជនៃគណធម្មយុតិកនិកាយនៃព្រះរាជាណាចក្រកម្ពុជា វត្តមានសម្តេចរាជបុត្រី ព្រះអនុជ នរោត្តម អរុណរស្មី ប្រធានគណបក្ស លោក កែវ ពុទ្ធរស្មី ប្រធានឧត្តមក្រុមប្រឹក្សា លោក ញឹក ប៊ុនឆៃ អគ្គលេខាធិការ ព្រមទាំងមន្រ្តីថ្នាក់ដឹកនាំបក្សជាច្រើនរូបទៀតនៅគេហដ្ឋាន សម្តេចប្រធានក្បែវិមានឯករាជ្យ រាជធានីភ្នំពេញ។
ព្រះរាជពិធីនេះ ធ្វើឡើងដើម្បីឧទ្ទិសថ្វាយនូវកងការមហាកុសលដែលកើតអំពី កូន ចៅ ចៅទួត និងប្រជានុរាស្រ្តខ្មែរ ។ មួយវិញទៀតគឺជាការសម្តែងនូវកត្តញូកត្តវេទិតាធម៌ចំពោះព្រះរាជបុព្វការីជន តាមព្រះឱវាទរបស់អង្គព្រះសម្មាសម្ពុព្រះបរមគ្រូនៃយើង ដែលបានប្រៀនប្រដៅឲ្យចះគោរពប្រតិបត្តិដល់អ្នកដ៏មានគុណ មាន មាតា បិតា អ្នកគ្រប់គ្រងប្រទេសជាតិ សាសនា និងព្រះមមហាក្សត្រ ដើម្បីប្រយោជន៍សេចក្តីសុខដល់អ្នកដែលរស់នៅជាកូន ជាចៅ និងប្រជារាស្រ្តទូទាំងនគរ ។
ថ្ងៃទី១៥ តុលា ២០១២ ជាថ្ងៃដែលប្រជារាស្រ្តខ្មែរទូទាំងនគរ មានមហាទុកក្រៀមក្រំយ៉ាងក្រៃលែងបំផុត ដែលព្រះករុណាព្រះបាទសម្តេចព្រះ នរោត្តម សីហនុ ព្រះមហាវិរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ទ្រង់បានយាងចូលទិវង្គត ក្នុងព្រះជន្ម ៩០ ព្រះវស្សា។ សេចក្តីគោរពស្រលាញ់ ស្រណោះអាឡោះអាល័យជាទន់ពេកនោះ មិនទាន់ឃ្លាតចាក់ទៅឆ្ងាយពីក្រអៅបេះដូងខ្មែរគ្រប់រូបនៅឡើយទេ ខួបរម្លឹកគម្រប់១ឆ្នាំបានមកដល់ ទាំងគណបក្សហ៊្វុនស៊ិនប៉ិច ទាំងរាជរដ្ឋាភិបាល និងប្រជារាស្រ្តខ្មែរទូទាំងប្រទេសបានរៀបចំប្រារពព្រះរាជពិធីនេះគ្រប់ ឃុំ ស្រុក ខេត្ត មន្ទីរ ក្រសួង និងទីអារាម ។
សូមរម្លឹកថា សម្តេចព្រះ នរោត្តម សីហនុ ជាស្ដេចដ៏មានទេពកោសល្យមួយអង្គ ហើយដែលត្រូវអាណាព្យាលបារាំង លើកឲ្យឡើងសោយរាជ្យនៅក្នុងព្រះជន្ម ១៩ ព្រះវស្សា ដោយបារាំងយល់ថា មានព្រះជន្មក្មេងអាចងាយនិងស្ដាប់បង្គាប់គេនោះ តែផ្ទុយទៅវិញព្រះអង្គបានធ្វើឲ្យប្រទេសបារាំងឈឺចាប់យ៉ាងឆ្អែតចិត្ត។ ក្រៅពីទាមទារឲ្យប្រទេសបារាំងជួយទាយកខេត្តមួយចំនួននៅ ភាគខាងលិច ដែលបារាំងកាត់ឲ្យប្រទេសសៀម យកមកឲ្យខ្មែរវិញនោះ គឺស្ដេចវ័យក្មេងអង្គនេះ បានទាមទារឯករាជ្យទាំងស្រុងនៅថ្ងៃទី៩ ខែវិច្ឆិការ ឆ្នាំ១៩៥៣ ជូនប្រទេសជាតិទៀតផង។
ស្ទើរតែពេញមួយព្រះជន្មរបស់ព្រះអង្គបានបម្រើប្រជានុរាស្រ្ត និងប្រទេសជាតិដោយព្រះអង្គបានចាត់ទុក ប្រជារាស្រ្តដូចកូនចៅរបស់ទ្រង់។ ពលិកម្មចំពោះប្រទេសជាតិ និងទឹកព្រះទ័យ ចំពោះប្រជារាស្រ្តនេះហើយ ដែលធ្វើឲ្យប្រជារាស្រ្តខ្មែរគ្មានថ្ងៃណានឹងបំភ្លេចទ្រង់បានឡើយ។ ការយាងចូលទិវង្គត់របស់ទ្រង់ពិតជាធ្វើឲ្យប្រជារាស្រ្តខ្មែរមានក្ដីរន្ធត់ និងសោកសង្រេងរកទីបំផុតគ្មាន៕ដោយ៖ ស.ស្អាត