ភ្នំពេញ៖ ក្រុមមន្រ្តីផ្នែកទេសចរណ៍របស់ប្រទេសម៉ាឡេស៊ី បានមើលឃើញថា ប្រជាពលរដ្ឋកម្ពុជា ជាមុខព្រួយ យ៉ាងសំខាន់ នៃកំណើនភ្ញៀវទេសចរ ដែលបានធ្វើដំណើរទៅកម្សាន្ត ទៅប្រទេសម៉ាឡេស៊ីនាចុងឆ្នាំ២០១៣នេះ។មន្រ្តីភ្នាក់ងារទេសចរណ៍ប្រទេសម៉ាឡេស៊ី លោក SYED YAHYA SYED OTHMAN បានមាន ប្រសាសន៍នៅក្នុង ពិធីបើក ពិព័រណ៍“ទស្សនាម៉ាឡេស៊ីឆ្នាំ២០១៤”និង “កញ្ចប់ទស្សនៈកិច្ច ទេសចរណ៍ឆ្នាំ២០១៤” ថា ប្រជាជនកម្ពុជា គឺជាទីផ្សារមួយដ៏សំខាន់នៅក្នុងតំបន់សម្រាប់ទេសចរណ៍ដែលទៅទស្សនា និងទេសចរណ៍សុខាភិបាល នៅ ប្រទេសម៉ាឡេស៊ី នាឆ្នាំនេះ ក្នុងនោះប្រទេសកម្ពុជា ក៏ជាគោលដៅ ទេសចរណ៍ វិសមកាល ដ៏មានប្រជាប្រិយភាព បំផុត សម្រាប់ប្រជាជនម៉ាឡេស៊ី វិញដែរ។
លោកបានបន្តថា ចំនួនភ្ញៀវទេសចរកម្ពុជា ទៅទស្សនានៅប្រទេសម៉ាឡេស៊ី បានកើនឡើង ជាបន្តបន្ទាប់ ក្នុងនោះ តាមរបាយការណ៍ដែលលោកទទួលបានរយៈពេល៩ខែ ដើមឆ្នាំ២០១៣នេះ ម៉ាឡេស៊ីទទួលបាន ភ្ញៀវទេសចរណ៍ កម្ពុជាប្រមាណជា៤៧.២៨៧នាក់ មានការកើនចំនួន៣២,៣%បើធៀបទៅនឹងឆ្នាំ២០១២ កន្លងទៅ។មន្រ្តីរូបនេះ បញ្ជាក់ថា ចំនួនតួរលេខនៃការកើនឡើងនេះ ជាសញ្ញាមួយបង្ហាញថា តំបន់កម្សាន្តនៅម៉ាឡេស៊ី បានក្លាយជា ចំណាប់អារម្មណ៍ថ្មីមួយសម្រាប់ប្រជាជនកម្ពុជាទៅទស្សនា និង ការធ្វើដំណើរកម្សាន្តសុខាភិបាល ។
គួរបញ្ជាក់ថា នៅរង្វង់ឆ្នាំ២០១២កន្លងទៅ ម៉ាឡេស៊ី បានធ្វើសន្និសីទសារព័ត៌មានមួយ បង្ហាញពីគុណភាពឱសថ និង សេវាកម្មសុខាភិបាល ដើម្បីអូសទាញប្រជាជនកម្ពុជាឲ្យទៅទេសចរសុខាភិបាលនៅប្រទេសរបស់ខ្លួន មិនខុស ពីពិព័រណ៍“ទស្សនាម៉ាឡេស៊ីឆ្នាំ២០១៤” និង“កញ្ចប់ទស្សនៈកិច្ចទេសចរណ៍ឆ្នាំ២០១៤” ដែលបានធ្វើ ឡើងកាលពី ប៉ុន្មានថ្ងៃនេះគឺជាការទាក់ទាញភ្ញៀវទេសចរកម្ពុជាឲ្យទៅកម្សាន្តនៅប្រទេសម៉ាឡេស៊ី និងជាការផ្លាស់ប្តូរដំណើរទេសចរណ៍ក៏ដូចជាការស្វែងយល់ពីគ្នាទៅវិញទៅមកក្នុងនាមប្រទេសជាសមាជិក ក្នុងតំបន់ ដែលគ្រោង នឹងធ្វើ សមាហរណកម្មសេដ្ឋកិច្ចនៅឆ្នាំ២០១៥ខាងមុខនេះ៕ សស្អាត