ភ្នំពេញ៖ ក្នុងសមាគមន៍ ប្រជាជាតិ អាស៊ីអាគ្នេយ៍ ហៅកាត់ថា អាស៊ានទាំងមូល ដែលមាន១០ប្រទេសនោះ មានភ្ញៀវទេសចរ អន្តរជាតិ មកចូលទស្សនា ចំនួន៩០.២លាននាក់ ក្នុងឆ្នាំ២០១៣ កន្លងទៅនេះ គិតជា ភាគរស្មើ១២ភាគរយ បើប្រៀបធៀប ឆ្នាំ២០១២។
តួលេខនេះ ត្រូវបានអ្នកសែត ទទួលបាន នៅក្រសួងទេសចរណ៍ នៅព្រឹកថ្ងៃទី២៧ ខែមករាឆ្នាំ ២០១៤នេះក្នុង សន្និសីទសារព័ត៌មាន ស្តីពីការចូលរួម កិច្ចប្រជុំរដ្ឋមន្ត្រី ទេសរណ៍អាស៊ាន លើកទី១៧ កិច្ចប្រជុំ រដ្ឋមន្ត្រីទេសចរណ៍អាស៊ាន-ចិន ជប៉ុន និងសាធារណៈរដ្ឋកូរ៉េ លើកទី១៣ និង វេទិកាទេសចរណ៍អាស៊ានឆ្នាំ២០១៤ នៅប្រទេសម៉ាឡេស៊ី ។ទេសចរផ្ទៃ ក្នុងប្រទេសអាស៊ាន មានចំនួន៤៦ភាគរយ ក្នុងកំណើន ប្រមាណ១០ភាគរយ។ តាមផែន ការយុទ្ធសាស្ត្រ ទេសចរណ៍ អាស៊ាន២០១១-២០១៥។ នៅឆ្នាំ២០១៥ខាងមុខនេះ អាស៊ានគ្រោងនឹងទទួល បានទេសចរ អន្តរជាតិ ប្រមាណ១០៧លាននាក់។
ដោយឡែក ក្នុងឆ្នាំ២០១៣នេះ កម្ពុជាទទួល បានទេសចរអន្តរជាតិ ប្រមាណ៤.២លាននាក់ កើនឡើង១៨ភាគរយ ធៀបនឹង ឆ្នាំ២០១២ ហើយ តាមការរំពឹងទុក កម្ពុជា អាចនឹងទទួលបាន ទេសចរអន្តរជាតិប្រមាណ ៥លាននាក់នៅក្នុងឆ្នាំ២០១៥ និង ប្រមាណ៧.៥លាននាក់ នៅឆ្នាំ២០២០ខាងមុខ។
លោក ថោង ខុន រដ្ឋមន្ត្រី ក្រសួងទេសចរណ៍ បានថ្លែងថា កម្ពុជាមាន សក្តានុពល ធម្មជាតិសម្បូរបែបណាស់ ដែលអាចទាក់ទាញ ភ្ញៀវទេសចរមក លេងកម្ពុជា ដូចជា ទេសចរវប្បធម៌ តំបន់ រមណីយដ្ឋាន ធម្មជាតិ ហើយគោលដៅអាស៊ានទាំងមូល និយាយជារួម និងកម្ពុជានិយាយដោយ ឡែក គ្រោង នឹងបង្កើតទេសចរណ៍ផ្លូវទឹក តាមដងទន្លេមេគង្គ ឱ្យរឹតតែមាន សក្កានុពល ថែមទៀត។
ក្នុងកិច្ចប្រជុំ នៅប្រទេសម៉ាឡេស៊ី អង្គប្រជុំក៏បានបញ្ចូល«ទេចរណ៍បែបសុខភាព»ជាផលិតផលទេសចរណ៍អាស៊ានថ្មី មួយទៀត ក្នុងផែនការ យុទ្ធសាស្ត្រ ទេសចរណ៍ អាស៊ាន ២០១១-២០១៥ និងបានជំរុញឱ្យ មានការរៀបចំផែនការ អភិវឌ្ឍន៍ អេកូទេសចរណ៍ អាស៊ាន។គួរបញ្ជាក់ថា កិច្ចប្រជុំរដ្ឋមន្ត្រីទេសរណ៍ អាស៊ានលើកទី១៧នេះ បានផ្តល់រង្វាន់ សណ្ឋាគារ បៃតងអាស៊ាន២០១៤-២០១៦ ចំនួន១០សណ្ឋាគារ សម្រាប់ប្រទេស នីមួយៗជាសមាជិកអាស៊ាន ដែលក្នុងនោះកម្ពុជា ក៏បានទទួលរង្វាន់ សណ្ឋាគារបៃតង ចំនួន១០ផងដែរ៕ ដោយ៖ រតនា