ភ្នំពេញៈ ក្នុងឱកាសបុណ្យចូលឆ្នាំថ្មីប្រពៃណីចិន-វៀតណាមឆ្នាំ២០១៤ កន្លងទៅថ្មីៗនេះ មានភ្ញៀវទេសចរជាតិអន្តរជាតិយ៉ាងច្រើនកុះករដើរកម្សាន្តដោយអ្នកខ្លះ ទៅលេងក្រៅប្រទេស តែដោយឡែកខ្លះបានធ្វើដំណើរកម្សាន្តរបស់ខ្លួននៅក្នុងស្រុកមានជាអាទិ៍ទីក្រុងព្រះសីហនុ ខេត្តកំពត កែប សៀមរាប រតនគិរី មណ្ឌលគិរី។ល។ក្នុងនោះ ក្រុងព្រះសីហនុ ជាទីក្រុងទេសចរណ៍សំបូរទៅដោយរមណីយដ្ឋានធម្មជាតិមានឆ្នេរសមុទ្រ កោះ ដ៏មានឆ្នេរខ្សាច់សស្អាតយ៉ាងវែង និងរមណីយដ្ឋានធម្មជាតិផ្សេងៗជាច្រើនកន្លែងបានទាក់ទាញភ្ញៀវទេសចរណ៍ ចូលមកទស្សនា និងលេងកម្សាន្តយ៉ាងច្រើនកុះករផងដែរ។
ប៉ុន្តែមិនថាតែនៅក្នុងពិធីបុណ្យចូលឆ្នាំថ្មីប្រពៃណីចិន-វៀតណាម ប៉ុណ្ណោះទេ នៅក្នុងពិធីបុណ្យជាតិ បុណ្យអន្តរជាតិឬក៏ថ្ងៃឈប់សម្រាកផ្សេងៗទៀត ក៏មានភ្ញៀវទេសចរណ៍ជាតិអន្តរជាតិមកទស្សនា និងលេងកម្សាន្តយ៉ាងច្រើន ហើយមិនតែប៉ុណ្ណោះ ក៏មានភ្ញៀវទេសចរណ៍បរទេសជាច្រើនសញ្ជាតិបានមកតាំងលំនៅស្ថាន និងបើកបម្រើសេវាទេសចរណ៍ និងសេវាកម្មផ្សេងៗទៀតយ៉ាងច្រើនសំបូរបែបសម្រាប់បម្រើឲ្យវិស័យ ទេសចរណ៍នៅលើទឹកដីខេត្តព្រះសីហនុផងដែរ។
បើតាមប្រសាសន៍របស់បងស្រី សុខ ស្រីស្រស់ ជាអាជីវករម្នាក់ ដែលមានទីតាំងនៅឆ្នេរសមុទ្រសម្រាប់ឲ្យភ្ញៀវសម្រាកកម្សាន្តបានឲ្យដឹងថា នាឱកាសនេះ ជាឱកាសមាសឱកាសប្រាក់សម្រាប់ពួកគាត់ ខណៈគាត់កំពុងនាំគ្នាដុតដៃដុតជើងរួតរះបម្រើសេវាកម្ម មានម្ហូបអាហារ និងកន្លែងសម្រាកកម្សាន្ត ដោយទឹកមុខរីករាយភ្លេចអស់ភាពនឿយហត់ក្នុងកំឡុងពេលនេះ។រីឯនៅកន្លែងសំចតយានយន្តវិញ គឺពេញសឹងតែរកកន្លែងចតគ្មានផងនេះបើតាមការឲ្យដឹងពីបងប្រុស ចំរើន ជាអ្នកទទួលផ្ញើឡានម៉ូតូនៅតំបន់ឆ្នេរអូឈើទាល។
ភាពរីកចំរើនលើស្ទើរគ្រប់វិស័យរបស់កម្ពុជា ពិសេស គឺវិស័យទេសចរណ៍ដែលជាឧស្សាហកម្មបៃតងដ៏សំខាន់សម្រាប់ការអភិវឌ្ឍន៍ ជាតិ។ មិនតែប៉ុណ្ណោះ មិនថានាឱកាសអ្វីនោះទេ តំបន់ទេសចរណ៍របស់ខេត្តមួយនេះពេញព្រៀបទៅដោយភ្ញៀវទេសចរសឹងគ្រប់សញ្ជាតិមកទស្សនាផងដែរ។
សូមបញ្ជាក់ថា បើយោងតាមមន្ត្រីជំនាញមន្ទីរទេសចរណ៍ខេត្តព្រះសីហនុ បានអះអាងថា ក្នុងឱកាសបុណ្យចូលឆ្នាំថ្មីប្រពៃណីចិន មានភ្ញៀវទេសចរណ៍ ប្រមាណជាងបួនម៉ឺននាក់ បានមកលេងកំសាន្តនៅខេត្តព្រះសីហនុ។បើប្រៀបធៀបទៅនឹងឆ្នាំ២០១៣ កន្លងមក មានការកើនឡើង ប្រមាណ ១២ ភាគរយ។ ហើយក្នុងដំណើកំសាន្តរបស់ភ្ញៀវទេសចរណ៍ នៅលើដែនគោក និងនៅតាមដែនកោះក្តី ពុំមានគ្រោះថ្នាក់អ្វីកើតឡើងមកលើភ្ញៀវនោះទេ គឺប្រកបដោយសុវត្តិភាព ក្នុងអំឡុងពេលបុណ្យចូលឆ្នាំចិននេះ៕ ដោយ៖ ភីន រ៉ា