ភ្នំពេញៈបន្ទាប់ពីថ្នាក់ដឹកនាំនិងគណៈប្រតិភូមកពីក្រសួង ស្ថាប័នរដ្ឋគោរពព្រះបរមរូបសម្តេចឱ ព្រះបរមរតនកោដិរួចកាលពីព្រឹកមិញនេះមក ប្រជាពលរដ្ឋជិតឆ្ងាយ ក្នុងរាជធានីភ្នំពេញ និងតាមខេត្តចាប់ផ្តើមធ្វើដំណើរមកគោរពវិញ្ញាណខន្ធនៃព្រះបរមរូបជាបន្តបន្ទាប់។ប្រជាពលរដ្ឋដែលធ្លាប់រស់ក្រោមម្លប់ដ៏ត្រជាក់ក្រោមការដឹកនាំរបស់សម្តេចឱ បានសម្តែងការនឹករលឹកនិងដឹងគុណជាពន់ពេកចំពោះវីរភាពដ៏ក្លាហានរបស់ព្រះអង្គបាននាំនាវាកម្ពុជា អោយពិភពលោកស្គាល់គ្រប់ទិសទីក្នុងសម័យសង្គមរាស្ត្រនិយម។
យ៉ាងណាក៏ដោយ ទន្ទឹមនឹងការសរសើរ ក៏មានការរិះគន់ពីប្រជាពលរដ្ឋខ្លះដែរ នៅកន្លែងគោរពបូជានោះ ដោយសារគ្មានកន្លែងដាក់ផ្កា និងដោតធួបត្រឹមត្រូវ។ពួកគេបានសំណូមពរអោយអ្នកមើលការខុសត្រូវកន្លែងនោះ រៀបចំកន្លែងដោតធួបមួយអោយបានត្រឹមត្រូវ ដើម្បីជៀសវាងការដោតធូបនិងដាក់ផ្កាពាសវាលពាសកាល ជាការមិនសមទេ៕
ដោយ៖ រតនា