ភ្នំពេញ៖ ចាប់តាំងពីថ្ងៃបើកបវេសនកាលមកដល់ពេលនេះ សិស្សថ្នាក់ទី១១ នៃវិទ្យាល័យបឹង ត្របែក មិនទាន់បានដំណើរការសិក្សារៀនសូត្រតាមកម្មវិធីសិក្សានៅឡើយទេ ដោយសារពួកគេជាប់ រវល់ជួបពិភាក្សាជាមួយ លោកស្រី សេង សុគន្ធា ដែលជានាយិករងពីបញ្ហាដោះដូរថ្នាក់រៀន។ ពីមួយថ្ងៃទៅមួយថ្ងៃ គេសង្កេតឃើញមានសិស្ស (ស្រីប្រុស)ទៅអង្គុយ ឬឈរតម្រង់ជួរគ្នាចាំជួបលោកស្រីនាយិការងដើម្បីដោះដូរថ្នាក់ឱ្យពួកគេមានឈ្មោះរៀនថ្នាក់ជាមួយមិត្តភ័ក្រដែលធ្លាប់រៀនជាមួយគ្នា កាលពីនៅថ្នាក់ទី១០។ បញ្ជីាឈ្មោះសិស្សថ្នាក់ទី១១ សម្រាប់ឆ្នាំសិក្សា២០១៣-២០១៤ ត្រូវបានរៀបចំឡើងក្នុងភាពមិនប្រក្រតី ដោយឈ្មោះសិស្សក្នុងថ្នាក់នីមួយៗត្រូវបានក្រឡុកបញ្ចូលគ្នា។
.JPG)
បើតាមប្រភពព័ត៌មានច្បាស់ការណ៍មួយបានឱ្យសារព័ត៌មានអ៊ិចប្រេសអាប់ដេតដឹងថា ដើម្បីបានរៀនថ្នាក់ជួបមិត្តភ័ក្រដូចកាលនៅរៀន ថ្នាក់ទី១០ សិស្សត្រូវទៅពិភាក្សាការងារដោះដូរថ្នាក់រៀនជាមួយនឹងលោកស្រី សេង សុគន្ធា នាយិការងទទួល បន្ទុកថ្នាក់ទី១១ ដោយភ្ជាប់ជាមួយនូវលុយចំនួនចាប់ពី១០ ដុល្លារអាមេរិកឡើងទៅទើបការងារបានសម្រេច តាមបំណង។
ប្រភពព័ត៌មានពីសិស្សថ្នាក់ទី១១ នៃវិទ្យាល័យបឹងត្របែកបានប្រាប់ដោយក្នុងលក្ខខណ្ឌសុំមិន បញ្ចេញឈ្មោះឱ្យដឹងថា ដោយសារបញ្ហាការដោះដូរសិស្សពីថ្នាក់មួយទៅថ្នាក់មួយនេះហើយ ធ្វើឱ្យសិស្ស មិនចូលរៀន គ្រូក៏មិនបានបង្រៀនដែរ ពីព្រោះតែបញ្ហាមិនទាន់មានបញ្ជីឈ្មោះសិស្សជាផ្លូវការនៅឡើយ។ បើតាមប្រភពព័ត៌មានពីលោកគ្រូ អ្នកគ្រូ ដែលអ្នកយកព័ត៌មានយើងបានជួបបានឱ្យដឹងថា លោកស្រី សេង សុគន្ធា ពិតជាអសមត្ថភាពក្នុងការគ្រប់គ្រងដឹកនាំពិប្រាកដមែន។
លោកស្រី សេង សុគន្ធា ត្រូវបានដំឡើង តួនាទីពីគ្រូបង្រៀនធម្មតាទៅជានាយិការងវិទ្យាល័យ ដោយសារអំណាចទឹកប្រាក់ប៉ុណ្ណោះ ពោលគឺ «តួនាទី នោះធ្លាក់ពីលើមេឃមក»។ប្រភពព័ត៌មានដ៏រសើបមួយបានឱ្យដឹងទៀតថា ចាប់តាំងពីកាន់តំណែងមកលោក ស្រីនាយិការង រូបនេះ តែងតែធ្វើការដោះដូរសិស្សពីថ្នាក់មួយទៅ
ថ្នាក់មួយ តាំងពីដើមឆ្នាំដល់ចុងឆ្នាំសិក្សា។ ពេលខ្លះ យកលុយសិស្សហើយមិនដូរថ្នាក់រៀនឱ្យសិស្សទៀត។ មិនតែប៉ុណ្ណោះទេ សូម្បីតែសៀវភៅសិក្ខាគារិក ធ្វើដោយខ្លួនឯងមិនប្រើគ្រូប្រចាំថ្នាក់តែបែរជាប្រើសិស្សឱ្យចម្លងពិន្ទុចូលទៅវិញ ។
លោកគ្រូ អ្នកគ្រូបានបញ្ជាក់ទៀតថា ពាក់ព័ន្ធនឹងបញ្ហានេះ មិនមែនថ្នាក់ដឹកនាំមន្ទីរអប់រំ យុវជន និងកីឡា រាជធានីភ្នំពេញ ដែលជាបេះដួងនៃប្រទេសកម្ពុជា មិនបានដឹងនោះទេ តែក៏មិនមានវិធានការអ្វីដែរ។ លោក ជា ជាតិ ប្រធានមន្ទីរអប់រំ និងលោក ហួត សំរិទ្ធ អនុប្រធានមន្ទីរអប់រំបានបញ្ជាក់ថា ការដាក់សិស្សក្រឡុកបញ្ចូលគ្នា គឺជាបច្ចេកទេសគ្រប់គ្រងសិស្សរបស់នាយក ឬនាយករង។ លោកគ្រូ អ្នកគ្រូ បានបង្ហាញ នូវភាពអត់ធ្មត់ដោយរង់ចាំមើលវិធានការរបស់ថ្នាក់លើ មុននឹងពួកគាត់ត្រូវជួបប្រជុំគ្នា ដើម្បីសម្រេច ចិត្តថា តើត្រូវដកហូតសេចក្តីទុកចិត្តក្នុងការគ្រប់គ្រងនឹងដឹកនាំពីលោកស្រី សេង សុគន្ធ ដោយរបៀបណា។
សូមរម្លឹកថា កាលពីថ្ងៃទី២៦ ខែកញ្ញា ឆ្នាំ ២០១៣ លោក ហង្ស ជួនណារ៉ុន ដែលជារដ្ឋមន្ត្រីថ្មីនៃក្រសួងអប់រំ យុវជន និងកីឡា ទើបតែបានប្រកាសផ្ទេរតំណែងក្រោមសក្ខីភាពពីលោក ឧបនាយករដ្ឋមន្ដ្រី សុខ អាន រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីកន្លងទៅថ្មីៗនេះ បានធ្វើការប្តេជ្ញាចិត្តរបស់ខ្លួនថា ដើម្បីសម្រេចឱ្យបាន នូវយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការជំរុញវិស័យអប់រំឱ្យមានការរីកចម្រើនក្នុងនាមលោកជាថ្នាក់ដឹកនាំក្រសួង នឹងប្តេជ្ញាប្រែក្លាយវិស័យអប់រំ ធ្វើយ៉ាងឱ្យក្លាយជាការវិនិយោគពិតប្រាកដ។ ឥឡូវវាដល់ពេលដែលលោករដ្ឋមន្ត្រីថ្មីរូបនេះ ចេញមុខបង្ហាញពីបេ្តជ្ញាចិត្តរបស់ខ្លួនហើយ ថាតើមន្ត្រីថ្នាក់ក្រោមរបស់ខ្លួននោះពួកគេប្រព្រឹត្តសកម្មភាពអ្វីខ្លះ? លោកក៏បញ្ជាក់ថា នឹងបន្តធ្វើកំណែទម្រង់ចំនុចខ្វះខាតដែលនៅសល់ ដូចជាការពង្រឹងភាពជាដៃគូ លើកកម្ពស់ជីវភាពគ្រូបង្រៀន និងជាពិសេសបណ្តុះបណ្តាលយុវជន ស្របតាមនិន្នាការតំបន់ ដើម្បីប្រគួតប្រជែងការងារប្រកបដោយគុណភាពខ្ពស់៕ ដោយ៖ មករា