ភ្នំពេញ៖ វិទ្យាល័យបឹងត្របែកជាសាលាធំមួយក្នុងរាជធានីភ្នំពេញធ្លាប់មានឈ្មោះល្បីល្បាញទាំងគណៈគ្រប់គ្រង សមត្ថភាពគ្រូបង្រៀន និងគុណភាពបណ្តុះបណ្តាលចំណេះដឹងដល់សិស្សានុសិស្ស សម្រាប់បម្រើឧត្តមប្រយោជន៍សង្គមជាតិតាំងពីអតីតកាល។ ប៉ុន្តែរៀមច្បងដឹកនាំដែលមានបទពិសោធន៍ល្អៗ ប្រកបដោយមនសិការទាំងនោះបានចូលនិវត្តន៍អស់ និងជំនួសមកវិញសុទ្ធតែមេដឹកនាំដែលមាន សែស្រឡាយព្រះឥន្ទ ព្រះព្រហ្មដែលជប់មកសម្រាប់ស្វែងរកលាភសក្ការៈថ្វាយអទិទេពជាម្ចាស់ប៉ុណ្ណោះ មិនមែនដើម្បីដឹកនាំអភិវឌ្ឍបន្ត និងរក្សាកិត្តិស័ព្ទរបស់វិទ្យាល័យឱ្យនៅគង់វង្សឡើយ ។
វិទ្យាល័យបឹងត្របែកបច្ចុប្បន្នដឹកនាំដោយលោក ផេង សុវណ្ណរ៉ា ជានាយក នាយិការងម្នាក់ និងនាយករង២នាក់គឺលោក ប្រ៉ុក ជិនថៃ លោក លី វិបុស និងលោកស្រី សេង សុគន្ធា។ ចាប់តាំងពីគណៈគ្រប់គ្រងថ្មីឡើងមកបញ្ហាអសមត្ថភាពដឹកនាំ ភាពមិនចុះសម្រុងគ្នាក្នុងក្បាលម៉ាស៊ីន ភាពមិនទទួលខុសត្រូវ មើលបំណាំគ្នា និងការប្រព្រឹត្តអំពើពុករលួយជំរិតទារប្រាក់ពីសិស្សតាមរយៈការដោះដូរថ្នាក់រៀន បំបាត់ឯកសារសិស្ស សិស្សមិនមករៀនបានឡើងថ្នាក់ និងការប្តូរវេនសិស្សរបស់គណៈគ្រប់គ្រងមួយចំនួនបានធ្វើឱ្យកេរ្តិ៍ឈ្មោះរបស់វិទ្យាល័យដាំក្បាលចុះស្ទើរដល់កម្រិតប្រកាសអាសន្ន។
លោកគ្រូ អ្នកគ្រូបានសង្កេតឃើញថា គណៈគ្រប់គ្រងវិទ្យាល័យទាំងអស់សុទ្ធតែជានាយក ក្តាប់រួម (នាយកធំ) ហាក់ដូចជាគ្មាននាយករង ឬនាយិការងឡើយ ពោលគឺគ្មានអ្នកណាស្តាប់បង្គាប់អ្នកណាតាមឋានានុក្រមឡើយ។ ម្នាក់ៗសុទ្ធតែអួតក្អេងក្អាងក្នុងក្អមថា ខ្លួនល្អត្រឹមត្រូវ បេះដូងបរិសុទ្ធ មានចំណេះជំនាញពេញទ្រូង ហើយចង់ផ្ទេរឱ្យអ្នកជំនាន់ក្រោយដើរផ្លូវអាក្រក់ លាក់ក្បាល លាក់កន្ទុយដូចខ្លួន ទៀតផង។
រឿងអាស្រូវ និងភាពអសកម្មទាំងឡាយនៅក្នុងវិទ្យាល័យសុទ្ធតែជាកំហុសនៃការបណ្តែតបណ្តោយរបស់ លោកនាយកក្តាប់រួមមិនមានការទទួលខុសត្រូវ មិនហ៊ានវះកាត់រាល់បញ្ហាដែលកើតមាន ហើយទៅស៊ុំគ្រលំគ្នាដើម្បីបានចំណែកផល ព្រោះម្នាក់ៗសុទ្ធតែមានចំណុចខ្សោយរៀងៗខ្លួន ម្ល៉ោះហើយទ្រាំបណ្តោយ តាមយថាកម្ម ពេលថ្នាក់លើស្តីបន្ទោសឆ្លើយដាក់គ្នាយករួចខ្លួន។ ការដឹកនាំគ្រប់គ្រងគ្មានផែនការ គ្មានតម្លាភាព នេះនៅរាល់ការប្រជុំរួមប្រចាំខែម្តងៗបុគ្គលិកពុំដែលទទួលបានរបាយការណ៍ចំណូលចំណាយថវិការួម ការទូ ទាត់កញ្ចប់ថវិកាបំរុង និងសមិទ្ធផលថ្មីៗឡើយ។
ភាពបែកបាក់គ្នាក្នុងជួរគណៈគ្រប់គ្រងត្រូវបានបុគ្គលិកមើលឃើញថា គ្រាន់តែជាឆាកល្ខោនដើម្បីសំងំកើបផលតាមជំនាញរៀងៗខ្លួន និងបំភ័ន្តភ្នែកបុគ្គលិកតែប៉ុណ្ណោះ។ ទាំងនាយកក្តាប់រួម ទាំងនាយិការង លោកស្រី សេង សុគន្ធា កំពុងមានបញ្ហាសព្វថ្ងៃ សុទ្ធតែជាធនធានមនុស្សដែលក្រសួងអប់រំ យុវជន និងកីឡា និងមន្ទីរអប់រំ យុវជន និងកីឡា រាជធានីភ្នំពេញជ្រើសរើសប្រកបដោយការវិនិច្ឆ័យ ដូចនេះគួរមានវិធីព្យាបាលកុំបណ្តោយឱ្យសាច់ស្អុយ ឬដំបៅងាវិវត្តក្លាយទៅជាមហារីក។
សកម្មភាពដំណើរការឆ្នាំសិក្សារបស់វិទ្យាល័យ គឺជាឆន្ទះ និងមនសិការរបស់គ្រូដែលអាណិតអាសូរសិស្ស និងគោរពភារកិច្ចរបស់ខ្លួនតែប៉ុណ្ណោះ បើសង្ឃឹមលើថ្នាក់ដឹកនាំវិញដូចជាអូសឬស្សីបញ្ចា្រសចុង ព្រោះរហូត មកដល់ពេលនេះដំណើរការសិក្សាជិតមួយខែទៅហើយនៅតែគ្មានបញ្ជីពិន្ទុសិស្សដដែល។
ថ្នាក់ដឹកនាំមន្ទីរអប់រំរាជធានីភ្នំពេញគួរមានវិធានការក្តៅ និងធ្វើអភិបាលកិច្ចលើបុគ្គលដែលជាអ្នកដឹកនាំ របៀបនេះឱ្យបានល្អិតល្អន់ផង ហើយបើចាំបាច់គួរតែផ្លាស់គាត់ទៅនៅជិតថ្នាក់លើវិញក៏ល្អដែរ ព្រោះជាធនធាន ដែលថ្នាក់លើស្នើឱ្យមកដឹកនាំដោយទទូចពីមុនមក។ ដំណាក់កាលកំណែទម្រង់ស៊ីម្រៅរបស់រដ្ឋាភិបាលអាណត្តិ ទី៥ នេះគួរតែមន្ទីរអប់រំយកចិត្តទុកដាក់ និងផ្តល់ឱកាសឱ្យវិទ្យាល័យបឹងត្របែកបានស្តារមុខមាត់ឡើងវិញ ព្រោះសព្វថ្ងៃការវាយតម្លៃវិទ្យាល័យនេះបានពិន្ទុសូន្យ។ជុំវិញការលើកឡើងខាងលើនេះ អ្នកសារព័ត៌មានយើងមិនអាចសុំធ្វើការបកស្រាយពីអ្នកគ្រប់គ្រង និងអ្នកពាក់ ព័ន្ធបានទេនៅថ្ងៃទី ២៨ តុលា ២០១៣៕
ដោយ៖ មករា