ភ្នំពេញ៖ វិទ្យាល័យបឹងត្របែកធ្លាប់មានបញ្ហារុំារ៉ៃដោះស្រាយមិនចេះចប់រឿងបញ្ហាដីធ្លីតាំងពីអតីតកាលមកដូចជា ការកាត់ច្រៀកទំហំដីមួយចំនួនទៅឱ្យសាលាច្បាប់ ដើម្បីបើកផ្លូវរបស់ខ្លួននៅច្រកទ្វារខាងត្បូង, ការបាត់បង់ទំហំដីមួយភាគធំនៅខាងក្រោយសាលាច្បាប់ដោយគ្មានការស្រាយបំភ្លឺពីអ្នកគ្រប់គ្រង ពីអាជ្ញាធរមូលដ្ឋាន និងថ្នាក់ដឹកនាំមន្ទីរអប់រំ ឬក្រសួងអប់រំយុវជន និងកីឡា ដែលជាអាណាព្យាបាល, ការទទួចចង់បានធ្វើជាទីតាំងនៃអង្គភាពវិស្វកម្មសំណង់ស៊ីវិលដែលមិនមែនជាខ្សែបណ្តោយរបស់ក្រសួងអប់រំជាដើម។
នេះជាកាលើកឡើងដោយមានត្អូញត្អែញ និងរិះគន់ពីសំណាក់លោកគ្រូ អ្នកគ្រូ បង្រៀនប្រចាំនៅវិទ្យាល័យបឹងត្របែកដោយចុះមិនបញ្ចេញអត្តសញ្ញាណប្រាប់អ្នកសារព័ត៌មាននគរឱ្យដឹងពីស្ថានភាពដឹកនាំរបស់នាយកគ្រប់គ្រងនៃវិទ្យាល័យបឹងត្របែកដែលអសមត្ថភាពលើការដឹកនាំ និងកំពុងធ្វើប្រព្រឹត្តអំពើពុករលួយនៅក្នុងសាលារៀននាពេលបច្ចុប្បន្ននេះ។
ប្រភពព័ត៌មានបន្តប្រាប់ឱ្យដឹងថា រាល់សមិទ្ធផលនៃការអភិវឌ្ឍន៍នៅវិទ្យាល័យបឹងត្របែកពីមុន និងបច្ចុប្បន្នជាលទ្ធផលរបស់តំណាងមាតបិតាសិស្សដែលកៀងគរជំនួយពីខាងក្រៅ, ការរួមចំណែកបរិចាកពីអតីតសិស្សរៀមច្បងជំនាន់មុនៗ, ការផ្តល់សំណងអគារកំពុងសាងសង់ដែលជាថ្នូរនៃការកាត់ដីទៅសាលាច្បាប់ និងការចំណាយថវិការបស់វិទ្យាល័យផ្ទាល់ក្រោមការដឹកនាំរបស់ គណៈនាយកពីមុនៗមកប៉ុណ្ណោះ ចំណែកឯសមិទ្ធផលថ្មីជាដុំកំភួន ក្រោមការដឹកនាំរបស់នាយកនា ពេលបច្ចុប្បន្នពុំទាន់មានលេចជារូបរាងនៅឡើយទេ។
ប្រភពព័ត៌មានច្បាស់ការណ៍ពីលោកគ្រូ-អ្នកគ្រូ បានបន្ថែមថា លោក ផេង សុវណ្ណរ៉ា នាយកវិទ្យាល័យបច្ចុប្បន្នតែងធ្វើការរិះគន់ និងទំលាក់កំហុសទៅលើការដឹកនាំគ្រប់គ្រង ទស្សនៈ និងស្នាដៃរបស់នាយកមុនៗថា មិនល្អ មិនមានភាពជឿនលឿន មិនមានប្រសិទ្ធភាព និងគ្មានចក្ខុវិស័យដូចការដឹករបស់ខ្លួន។ ប៉ុន្តែភាពជាក់ស្តែងដែលបុគ្គលិកទាំងអស់គ្នាបានដឹងឮ បានឃើញ និងកំពុងសង្កេតមើលការដឹកនាំរបស់លោកវិញ គឺពុំអាចប្រៀបផ្ទឹមជាមួយអតីតនាយកជំនាន់មុនៗបានឡើយ ពោលគឺសូម្បីតែនាយិការង សេង សុគន្ធាមកធ្វើការមិនជាប់លាប់ដោយគ្មានដំណឹង និងតែងតែប្រើសិស្សឱ្យជួយធ្វើ កិច្ចការស្នូលជំនួសពេលកំពុងសិក្សាជាដើម ក៏លោកនាយកធ្វើការណែនាំ និងមានវិធានការបញ្ឈប់ សកម្មភាពអវិជ្ជមាននេះពុំបានផង។
លោកនាយកច្រើនមានទស្សនៈចៅចាក់ស្មុកដោយដុំ និងរេផ្លិចជ្រុល ដូចជា៖ គម្រោងសាងសង់ផ្សារសម្រាប់លើកកម្ពស់អនាម័យ សុខភាពនៃការទទួលទានអាហារ របស់សិស្ស ដែលគណៈកម្មការបានស្នើដោយទទូច និងមានថវិការរាប់ម៉ឺនដុល្លារក្នុងដៃបែរជាធ្វើមិនបាន រីឯបញ្ហាវាយបំផ្លាញកម្រេចចោលបង្គន់អនាម័យដែលកំពុងប្រើប្រាស់ចាំបាច់របស់សិស្សនៅអគារ ខាងជើង ក៏ដូចជាការវាយរបងបើកផ្លូវឱ្យសាលាច្បាប់ដឹកជញ្ជូនសម្ភារៈសំណង់ដែលបង្ករប៉ះពាល់ធ្ងន់ ធ្ងរដល់សិស្ស ហើយត្រូវបានជំទាស់ដាច់ខាតដោយគណៈកម្មការចំនួនបីលើករួចមកហើយនោះបែរជា លោកនាយកខាងលើនេះ ខិតខំយ៉ាងស្វិតស្វាញបំផុតទៅវិញ។ ការខំប្រឹងប្រែងរបៀបឆ្លាតជ្រុលពេកនេះត្រូវបានបុគ្គលិក និងគណៈនាយកខ្លះមើលឃើញថា លោក ផេង សុវណ្ណារ៉ាបានទទួលលាភសក្ការៈជាច្រើនក្នុងហោប៉ៅរបស់ខ្លួន ទើបបានជាខំអង្វរសមាជិកគណៈកម្មការឱ្យយល់ព្រម។
ប្រភពព័ត៌មានដដែលបានបញ្ជាក់ថា កាលពីឆ្នាំសិក្សា ២០០២-២០០៣ វិទ្យាល័យបឹងត្របែកបាន កាត់ដីទំហំធំ ដោយមានក្បាលដីប្រវែង១៣ ម៉ែត្រ តាមការស្នើសុំ និងចរចាចង់បានរបស់សាលាច្បាប់ ធ្វើជាថ្នូរនឹងការចេញ-ចូល លើការដឹកជញ្ជូនផ្សេងៗតាមច្រកទ្វារខាងត្បូងរបស់ខ្លួនរហូតដល់ទីធ្លាខាង ក្រោយ។ ប៉ុន្តែដោយការកេងចំណេញ និងធ្វើអាជីវកម្ម គាត់បានយកផ្លូវនេះធ្វើជាទីលានកីឡា និងកន្លែងអាហារដ្ឋានទៅវិញ។ ទីបំផុតត្រូវតែរំខាន់វិទ្យាល័យបឹងត្របែក ដោយប្រើប្រាស់យន្តការក្រសួងអប់រំមិនខ្ចីឆ្លងយោបល់មន្ទីរអប់រំរាជធានី ហើយអាចនឹងទម្លាក់ទ្រនាប់ដៃខ្លះដល់នាយក ផេង សុវណ្ណារ៉ា ជាការស្រេច។
ការងារលោកនាយកសព្វថ្ងៃ គឺធ្វើជំនួញច្រើនជាងការងារដឹកនាំគ្រប់គ្រងសាលារៀន គឺគាត់ចង់បំបាត់សមិទ្ធផលចាស់ៗជាងការអភិវឌ្ឍឱ្យបានល្អនៅក្នុងអង្គភាពដែលកំពុងទទួលខុសត្រូវ បើមាន សភាពការណ៍អសន្តិសុខ ដូចជា ក្មេងវាយតប់គ្នា ដេញកាប់គ្នាតាមថ្នាក់រៀន ឬក្នុងទីធ្លាសាលាក្តី គាត់ដោះស្រាយយករួចខ្លួនដោយគ្មានវិធានការក្តៅ មិនសហការជាមួយអាជ្ញាធរមានសមត្ថកិច្ច រំលាយ គណៈកម្មាការសន្តិសុខចោល ហើយបណ្តោយឱ្យមានភាពអនាបិតេយ្យកើតមានឡើងជាបន្តទៀតជា ញឹកញាប់។
លើសពីនេះទៀត បើមានការងារដែលមានប្រាក់ចំណូលរួមមាន ជួលទីតាំងក្នុងសាលា ចង់ឱ្យស្ថាប័នផ្សេងមកនៅក្នុងសាលា ព័តឥមានដោះដូរដីធ្លីអង្គភាពនានាជាមួយសាលា គឺគាត់ធ្វើដោយស្វាហាប់មិនខ្លាចនឿយហត់ និងមិនបាច់ធ្វើការពិគ្រោះយោបល់ជាមួយនឹងបុគ្គលិក ឬគណៈនាយកដទៃទៀតឡើយអាងតែអំណាចបុណ្យសក្តិខ្លួនធំជាងគេ។
លោកគ្រូ-អ្នកគ្រូ ភាគច្រើនបាននិយាយថា «មន្ទីរអប់រំពូកែជ្រើសរើសនាយកមកដឹកនាំមែន គឺជាអ្នកដែលមានជំនាញខាងមុខរបរជំនួញ គួកជេ ច្រើនជាងភាពជាអ្នកដឹកនាំខាងវិស័យអប់រំ»។ ហើយលោកគ្រូ អ្នកគ្រូខ្លះទៀត បានពោលថា«ការដឹកនាំគ្រប់គ្រង ការអភិវឌ្ឍន៍ផ្សេងៗ ប្រសិនបើពូកែ ដូចការធ្វើជំនួញ គួកជេជួលទីតាំងដែលកំពុងធ្វើសព្វថ្ងៃនេះវិញ មិនដឹងថាវិទ្យាល័យបឹងត្របែកមានការរីកចម្រើន និងអភិវឌ្ឍខុសប្លែកពីគេយ៉ាងណាទេ»។
ប្រភពព័ត៌មានដែលមិនលាក់លៀមខាងលើ បានអំពាវនាវដល់នាយក និងនាយិការនៃវិទ្យាល័យមួយនេះ និងមន្ទីរ ក្រសួងអប់រំមានវិធាការដ៏តឹងរ៉ឹងបំផុតចំពោះនាយកទាំងខាងលើនេះ ដើម្បីរកភាពរីកចម្រើន មានសាមគ្គីផ្ទៃក្នុងល្អប្រសើរ និងភាពជាអ្នកដឹកនាំល្អប្រកបដោយទេពកោសល្យឈ្លាសវៃ ក្លាហានម៉ឹងម៉ាត់ និងមានភាពទទួលខុសត្រូវខ្ពស់ លោកនាយកគប្បីលះបង់ចោលនូវរបៀបរបបគ្រប់គ្រងដែលកំពុងតែអនុវត្តនាពេលបច្ចុប្បន្ន។
ពាក់ព័ន្ធជុំវិញការរិះគន់របស់លោកគ្រូ អ្នកគ្រូ ខាងលើនេះដែរ អ្នកសារព័ត៌មានយើងមិនអាចទាក់ទងសុំការបំភ្លឺបានទេពីនាយកសាលានៅថ្ងៃទី ៣ ធ្នូ នេះ ដោយសារទូរស័ព្ទរបស់លោកមិនមានការឆ្លើយតប៕ ដោយ៖ ភីនរ៉ា