ស្ទឹងត្រែង៖ ស្ទឹងត្រែងជាខេត្តមួយដ៏ស្រស់ស្អាតមានទីតាំងនៅលើខ្ពង់រាប តាមបណ្តោយទន្លេមេគង្គដែលប្រសព្វជាមួយនឹងទន្លេសេកុង។ ខេត្តនេះមានចម្ងាយប្រមាណ៤៥៥គីឡូម៉ែត្រពីទីក្រុងភ្នំពេញ និង៤០គីឡូម៉ែត្រពីព្រំដែនឡាវ។ បច្ចុប្បន្នខេត្តស្ទឹងត្រែងមានការទាក់ទាញអ្នកទេសចរគួរឲ្យកត់ សម្គាល់មកលេងតំបន់ទេសចរណ៍មួយចំនួនដូចជាល្បាក់ខោន ប្រាសាទ ប្រាំបួនល្វែង វត្តហាំងខូបា អូរពងមាន់ កោះ ខ្សាច់ជាដើម ជាងនេះទៅទៀតស្ទឹងត្រែង ក៏មានភាពល្បីល្បាញខាងអំពិលផ្អែម ត្រីប៉ាសេអ៊ីដែលមានរសជាតិឆ្ងាញ់បំផុតដែលអ្នកទេសចរជាច្រើននិយម ចូលចិត្ត។
ខេត្តស្ទឹងត្រែងត្រូវបានភ្ញៀវទេសចរទទួលស្គាល់ថាមានតំបន់ទេសចរណ៍ដែលមានសោភ័ណភាពដ៏ស្រស់ត្រមកាលជាច្រើនកន្លែងរង់ចាំទទួលស្វាគមន៍ភ្ញៀវទេសចរជាតិ និងអន្តរជាតិមានដូចជា៖ទី១-អូរពងមាន់៖ គឺជារមណីយដ្ឋានធម្មជាតិ និងកែច្នៃដែលមានទីតាំងស្ថិតនៅភូមិអូរពងមាន់ ឃុំអូរពងមាន់ស្រុកស្ទឹងត្រែងមានចម្ងាយ៩គីឡូម៉ែត្រពីទីរួមខេត្តស្ទឹងត្រែងស្ថិតនៅខាងស្តាំនៃផ្លូវជាតិលេខ៧ត្រង់ចំណុចផ្លូវបំបែកឆ្ពោះទៅខេត្ត រតនគិរី ក្រចេះនិងស្ទឹងត្រែង។
អូរពងមាន់ជាកន្លែងកម្សាន្តមួយដ៏ស្រស់បំព្រងដែលអ្នកទេសចរចាប់អារម្មណ៍ ពីព្រោះទឹកអូរ ពងមាន់មានប្រភពពីក្នុងដីចម្ងាយពីតំបន់កម្សាន្ត៥០គីឡូម៉ែត្រ ហូរខួបប្រាំងវស្សាចូលទៅក្នុងបឹងធំមួយដែលមានលក្ខណៈជាអាងស្តុកទឹកសម្រាប់ការងូត កម្សាន្តរបស់អ្នកទេសចរ។នៅទីនោះមានខ្ចូសតូចៗ សម្រាប់អង្គុយលេង ស្ទូចត្រី ញុំាអាហារ ប្រកបដោយខ្យល់អាកាសបរិសុទ្ធណាស់។
ទី២-ថាឡាបរិវ៉ាត់ ៖ គឺជាតំបន់ទេសចរណ៍មួយដ៏ស្រស់ត្រកាលស្ថិតក្នុងទឹកដីស្រុកថាឡាបរិ វ៉ាត់ដែលមានចម្ងាយតែ៤គីឡូម៉ែត្រ ប៉ុណ្ណោះពីទីរួមខេត្តស្ទឹងត្រែង។ ការធ្វើដំណើរទៅរមណីយដ្ឋានទេសចរណ៍នេះចាំបាច់ត្រូវធ្វើដំណើរឆ្លងកាត់ ទន្លេសេកុង និងទន្លេមេគង្គទៅកាន់ផ្លូវខេត្តព្រះវិហារ។
ថាឡា បរិវ៉ាត់ជាប្រភេទរមណីយដ្ឋានប្រវត្តិសាស្ត្រដែលនៅទីនោះមានប្រាសាទ ព្រះគោដែលកសាងឡើងនៅ
សតវត្សរ៍ទី៧ ដល់ទី៨ធ្វើ អំពីឥដ្ឋក្រហមក្នុងរជ្ជកាលស្តេចជយវរ័ន្មទី១ និងនៅពីមុខប្រាសាទមានរូបសំណាកព្រះគោដែលមានទំហំធំនៅក្នុងប្រទេសកម្ពុជាយើងនេះ។ អ្នកទេសចរតែងតែមានការចាប់អារម្មណ៍យ៉ាងខ្លាំងទៅនឹងក្រុមប្រាសាទ តូចធំជាច្រើនទៀតដែលនៅជិតៗនោះ។
ទី៣-កោះខ្សាច់ ៖ គឺជាតំបន់ទេសចរណ៍មួយដែលមានទីតាំងនៅលើដងទន្លេសេកុងដែលមាន ចម្ងាយ៥គីឡូម៉ែត្រពីទីរួមខេត្ត។ កោះខ្សាច់ជាប្រភេទរមណីយដ្ឋានធម្មជាតិតាមរដូវគឺអ្នកទេសចរអាចទៅ លេងបាននៅក្នុងរដូវប្រាំង ជាពិសេសពេលបុណ្យ ចូលឆ្នាំប្រពៃណីខ្មែរយើង។ តំបន់នេះមានឆ្នេរខ្សាច់ល្អស្អាតមានប្រវែង២គីឡូម៉ែត្រនិងទទឹង៥ គីឡូម៉ែត្រ ពោលគឺអ្នកទេសចរអាចទៅងូតទឹកកម្សាន្តលេងនៅលើឆ្នេរខ្សាច់បានយ៉ាងសប្បាយរីករាយនិងប្រកបទៅដោយអនុស្សាវរីយ៍មិនអាចបំភ្លេចបានឡើយ។
ទី៤-វត្តហាំងខូបា៖ គឺជាតំបន់ទេសចរណ៍មួយដែលអ្នកទេសចរមិនអាចរំលងបានមានទីតាំងនៅ ភូមិហាំងខូបា ឃុំហាំងខូបា ក្រុងស្ទឹងត្រែងមានចម្ងាយ៦គីឡូម៉ែត្រពីទីរួមខេត្តតាមផ្លូវទៅព្រលានយន្តហោះបត់ឆ្វេងឆ្លងកាត់ទន្លេសេកុង។ វត្តហាំងខូបាជាប្រភេទរមណីយដ្ឋានវប្បធម៌ប្រវត្តិសាស្ត្រពីព្រោះវត្ត ហាំងខូបាមានអាយុកាលជាង៣០០ឆ្នាំមកហើយ។
ទី៥-បុរីអូរស្វាយ ៖គឺជាផ្នែកមួយនៃរាជធានីអាណាចក្រខ្មែរសម័យបុរាណបច្ចុប្បន្នបាននឹងកំពុងតែក្លាយទៅជាតំបន់ទេសចរណ៍មួយដ៏ពេញនិយមសម្រាប់អ្នកដែលចូលចិត្ត ដើរកម្សាន្ត ពីព្រោះនៅទីនេះមានទេសភាពស្រស់បំព្រងណាស់ជាពិសេសពពួកសត្វស្លាប។
នៅរមណីយដ្ឋានទេសចរណ៍បុរីអូរស្វាយ គឺប្រៀបបាននឹងត្បូង ពេជ្រដ៏មានតម្លៃដែលបានបង្អួតខ្លួនឡើងនៅក្នុងទ្រូងព្រៃត្រូពិច ពណ៌បៃតងលាត សន្ធឹងតាមបណ្តោយទន្លេមេគង្គ។ បុរីអូរស្វាយក៏បានផ្តល់នូវសម្បត្តិធនធានព្រៃឈើដែលជាជម្រកដ៏ ប្រសើរសម្រាប់ហ្វូង បក្សាបក្សី ជាពិសេសសត្វផ្សោតទឹកសាប។បុរីអូរស្វាយស្ថិតក្នុងឃុំអូរស្វាយនៃស្រុកថាឡាបរិវ៉ាត់មាន ចម្ងាយ៥៧គីឡូម៉ែត្រពីផ្លូវជាតិលេខ៧និងអាចធ្វើដំណើរតាមដងទន្លេមេគង្គដែលហូរទៅទិសពាយព្យនៃក្រុង ស្ទឹងត្រែង ។
ទី៦-អូរឫស្សីកណ្តាល ៖ គឺជាតំបន់លំហែកាយមួយមានទីតាំងស្ថិតនៅភូមិ-ឃុំ អូរឫស្សីកណ្តាល ស្រុកសៀមបូក តាមផ្លូវជាតិលេខ៧មានចម្ងាយ៣០គីឡូម៉ែត្រភាគខាងត្បូងនៃទីរួម ខេត្តស្ទឹងត្រែងនៅជាប់នឹងព្រំប្រទល់នៃទឹកដីខេត្តក្រចេះ។ ជារៀងរាល់ថ្ងៃនៅអូរឫស្សីកណ្តាលគេសង្កេតឃើញ មានភ្ញៀវទេសចរមកពីទីក្រុងភ្នំពេញ ខេត្តក្រចេះជាដើមបានមកលេងកម្សាន្តនៅទីនេះ ។
នៅរមណីយដ្ឋានទេសចរណ៍ធម្មជាតិអូរឫស្សីកណ្តាលនេះដែរមានប្រភព ទឹកធម្មជាតិហូរមកពីតំបន់ស្រុកសេសានខួបប្រាំងវស្សាថ្លាដូច កញ្ចក់ឆ្លុះឃើញដល់បាតទឹកដែលមានហ្វូងមច្ឆាតូចៗហែល ប្រដេញគ្នាតាមខ្សែទឹកហូរនៃជ្រ លងអូរវែងអន្លាយ។ នៅអមតាមមាត់អូរគេឃើញមានដើមឈើតូចធំដុះប៉ប្រះនឹងផ្ទៃទឹកផ្តល់ ជា ម្លប់យ៉ាងត្រជាក់
ពិសេសដើមឫស្សី ពោលគឺសម្រស់ធម្មជាតិនៅទីនេះប្រសិនបើលោកអ្នកបានគយគន់ហើយប្រាកដជាជក់ចិត្តដិតអារម្មណ៍មិនខាន។ទី៧-ល្បាក់ខោនឬទឹកជ្រោះសុភក្តិមិត្ត៖ គឺជាតំបន់មួយដែលមានទឹកទន្លេមេគង្គហូរឆ្លងកាត់បង្កើតបានជាជ្រោះមើលទៅគួរឲ្យទាក់ទាញខ្លាំងណាស់។
ដើម្បីបានទៅដល់ទីនោះចាំបាច់ភ្ញៀវទេសចរទាំងអស់ត្រូវធ្វើដំណើរតាម ផ្លូវជាតិលេខ១០៤ផ្លូវទៅខេត្តព្រះវិហារឆ្ពោះទៅទឹកដីឃុំព្រះរំកិលនៃខេត្តស្ទឹងត្រែង លុះយើងបានមកដល់ឃុំព្រះរំកិល ហើយភ្ញៀវទេសចរអាចបន្តដំណើរដោយរថយន្តឬក៏ជិះទូកទេសចរណ៍ចេញពីកំពង់ផែព្រំដែនតាមដងទន្លេមេគង្គក៏បានចម្ងាយប្រមាណជា៦គីឡូម៉ែត្រ ទៀតនោះយើងនឹងបានទៅដល់ល្បាក់ខោនដែល ស្ថិតនៅក្នុងឃុំព្រះរំកិល ស្រុកថាឡាបរិវ៉ាត់និងមួយផ្នែកស្ថិតនៅក្នុងភូមិ-ឃុំកំពង់ស្រឡៅ ស្រុកឆែប នៃទឹកដីខេត្តព្រះវិហារ។
ល្បាក់ខោនគឺជាតំបន់ទេសចរណ៍មួយដែលផ្ទៃទឹកទន្លេមេគង្គហូរឆ្លងកាត់ ចុះមកមាន កម្ពស់២៦ម៉ែត្រចេញពីខ្ពង់រាបជាប់ព្រំដែនប្រទេសកម្ពុជា និងសាធារណរដ្ឋឡាវ ហើយនៅល្បាក់ខោននេះសព្វថ្ងៃបាននឹងកំពុងតែទាក់ទាញភ្ញៀវទេសចរខ្លាំងណាស់៕ ដោយ៖ ភីនរ៉ា